Selig si dú heide

Selig si dú heide·
selig si dú owe·
selig si der kleinen vogellinen suͤsser sank·
blůmen lǒb dú beide·
stant in maniger schǒwe·
die der kalde winder húre mit sinem froste twank·
dien ist an ir froͤiden wol gelvngen·
als moͤht ǒch ich an minen froͤiden wider ivngen·
troste mich ein roter mvnt nach dem min herze ie rank·

Mir was wie min swere·
hete ein lieplich ende·
do mir seite ein botte ich solte in froͤiden froͤlich sin·
Ich was froͤidebere·
sorge was ellende·
in mime herzen·
do ich wande ir mvndes roter schin·
der wolde in min herze lieblich lachen·
ald kan dú minne ein wnder an vns beiden machen·
minne tů mir swie dv wellest der gewalt ist din·

Roter mvnt nv lache·
das mir sorge swinde·
roter mvnt nv lache dc mir sendes leit zerge·
lachen dv mir mache·
dc ich froͤide vinde·
roter mvnt nv lache dc min herze fro beste·
sit din lachen mir git hohgemvͤte·
neýna roter mvnt so lache mir durh dine gvͤte·
lacheliche roͤselecht wes bedoͤrfte ich me·

Minnenklich gedinge·
froͤit mich mange stvnde·
dc mich troͤste ein roter mvnt des ich noch nie vergas·
minnenklich gedinge·
ob ich dc da fvnde·
so kvnde mir vf erde niemer werden bas·
roter mvnt hilf mir von den noͤten·
ane got so kan dich nieman alse wol geroͤten·
got der wc in froͤiden do er dich als ebene mas·

Wolde mir dú here·
sende sorge ringen·
dc neme ich fúr der vogel sang·
vnd fúr der blv̊men schin·
vnd si nach miner lere·
růhte froͤide bringen·
mir so were min truren krank· vnd wolte in froͤiden iemer sin·
hilf mir helferichv́ svͤsse minne·
twinc die lieben sam si hat betwungen mine sinne·
vntz si bedenke minen seneclichen pin·