Sit das der winter hat die blv̊men in getan

Sit das der winter hat die blv̊men in getan·
der kleinen vogelin suͤssen sank
in walde vnd ǒch in ǒwen·
so wil ich raten da wir besser froͤide han·
swer volge mir der habe des dank·
die reinen suͤssen frowen·
die sol man alle stunde·
fúr blůmen vf der heide sehen·
heý welh ein lebendes ǒgenbrehen·
swa spilnde blike bringent munt zemvnde·

Nv dar dem mit dem kusse ein suͤsser vmbe vang
nah richer minne teil erget·
wer kur da fúr die rosen·
fúr war des sinne mvͤsten iemer wesen krank·
min mvnt der lúste bi gestet·
heý muͤst ich mich erkosen·
mit der vil lieben eine·
dú auentúre wurde las·
der ich in sange e mich vermas·
dc mvͤste si vergeben mir dú reine·

Uil zarte suͤsse vnd iemer wol gewúnschet wib·
min trost den ich ze froͤiden han
lit a dir vil klare gůte·
mich sol din hohgezierter loser lieber lib·
in keinen senden sorgen lan·
hilf mir zehohen mv̊te·
wie wol mich des geluste·
so sich zelachen gebe din mvnt·
dc ich in in der lieben stvnt
so lachelichen mir ze froͤiden kuste·