Sol ich mich rihten nah dem â

Sol ich mich rihten nah dem â·
dc kan ich wol gezeigen wa·
da kere ich vf des meisters sla·
der ê sang von der nebel krâ·
vinde ich niht meisterschefte da·
so kere ich mich her wider sa·
vnd kloph ich anderswar dar na·

Genv̊ge die sprechent singe als ê·
pruͤfe vns die blv̊men vnd den kle·
die wellent niht dc ich verstê·
wc mir dar an zeherzen gê·
swie vil ich in hie vor geschre·
dc tet in in den oren we·
nvn wil ich si niht toͤiben me·

Ich mag wol sprechen bc owi·
danne ieman der nv lebende si·
mir wont ein vngemvͤte bi·
dc swere machet als ein bli·
vnd het ich miner kreften dri·
ich tort als ein vervrornes zwi·
dú liebe tůt mich sorgen vri·

Ich froͤite mich do stůnt es so·
owe wan were es alse do·
so stuͤnde min gemvͤte ho·
dvrch vorhte lieze ich noh durh dro·
in wurde noh wol alse vro·
zv̊ der miner froͤiden zwo·
het ich die schonen vf ein strô·

Ich mag wolwunder schrine wû·
dc ich bin so verdorben nv·
ia herre got wan vuͤgest dv·
dc ich niht lege in leides drv·
ich han den aker noh den bv̂·
min sleht dc ist alles worden rv·
des mv̊s ih liden spotes hv·