Svmer nv wil din gewalt (Mit aufgelösten Abbreviaturen)

Svmer nv wil din gewalt·
walt· den anger vnd die heide·
beide· kleiden dast dien kleinen vogelin not·
man siht blv̊men manigvalt·
valt· an maniger stolzen meide·
reide· loͤke tragentz vnd mv̊ndel rot·
seht der froͤide was vil nach zergangen·
ach mis herzen ia mv̊s mich belangen·
nach dem truͤtelehten libe owe wan wer er min·

Wil si das mich leit verber·
ber· mir froͤide von ir mvnde·
wnde· von der minne wirt vil schiere heil·
dc ir gvͤte mich gewer·
wer· ist der mir des verbvnde·
kvnde· ich flůchen dem wnschte ich dc im vnheil·
were bi vil lange vnntz an sin ende·
svͤssú minne svͤsse helfe sende·
des ist not sit ich von dinen schvlden sorge ie leit·

Ach wie ist so gar liep gv̊t·
gv̊t· neme ich niht fúr die ich meine·
si eine· troͤste mich dc ist der minne has·
ir mv̄t roter danne ein blv̊t·
blv̊t· des meigen froͤit mich kleine·
reine· selig wib nv troͤstent bas·
beschiht des niht^{[WS 1]} so mv̊s ich gar verderben·
sol ich niht den roten kvs erwerben·
vnd den truͤtelehten lip so wirde ich froͤiden bar·

Ratent wie ich das ervar·
var· ich vmbe in allem lande·
rande· ich tvsent mile es wer bewendet wol·
wie ich des genême war·
war· ich kerte vs minne bande·
brande· si mich niht so hete ich senften dol·
svs hat mich dv́ minnekliche entzv́ndet·
ich enweis wes si sich an mir sv́ndet·
laschte si mich mit ir minne mir wrde deste bas·

Minne ich diene di dv solt·
solt· mir geben minneklichen·
richen· maht dv mich an froͤiden dc ist zit·
ob mir dc din helfe erholt·
holt· bin ich dir inneklichen·
wichen mv̊s von mir leit dc mir nahe lit·
minneklichv́ minne ich was gebvnden
dir von kinde ie wiltv mich nv wnden·
wc tǒgt danne stetú trúwe minne dc verbir·

Anmerkungen (Wikisource)

1. Vorlage: beſchiht niht.