Svmer zieret· heide vn̄ ang̾ vn̄ den walt

Svmer zieret· heide vn̄ ang̾ vn̄ den walt·
da manig h̾ze balt· dē lib kunrieret^{[WS 1]}·
wā mag ſchowē wohl bekleidet berg vn̄ tal·
da hoͤꝛt mā die nahtegal vn̄ ī dē ǒwen·
hie vō froͤit ſich al dú w̾lt gemeine·
da bi kleine· iſt mī froͤide zaller zit·
ſit dc mir niht froͤide git· dú ſvͤſſe reine·
Si iſt voꝛ valſche wol behůt·
div mich ſingē tůt·

Der ich ſinge· vn̄ vil gedienet han·
div wil ſich des niht entſtan· war nach ich ringe·
nach ir huldē ringe ich alle mine tage·
alſo dc ich ſoꝛge trage· die mv̊s ich duldē·
bis dc ich noch liebē troſt gewīne·
vō d̾ mīne· ſoſt min ſoꝛge gar ein trǒm·
ſvs trage ich dē iam̾s ſǒm· in minē ſinnē·
Si iſt voꝛ valſche wol behůt·
div mich ſingē tůt·^{[WS 2]}

Zeinē male ſchos ir mīneklich̾ ſchin·
ī das ſende h̾ze min· ir mīne ſtrale·
die ich tvmb̾ iem̾ mere bi mir trůg·
alſo dc ichs nie gewůg· dē groſſen kvmb̾
trage ich vn̄ ǒch ander klagende ſw̾e·
biſ ein mere· mir vō d̾ vil lieben kvmt·
dc ſi mih ze froͤidē vꝛumt· dú ſeldēbere·
Si iſt voꝛ valſche wol behůt·
div mich ſingē tůt·^{[WS 3]}

Lieblich lachē· liehtē ǒgē rot̾ mv̄t·
ſchafent hvnd̾tvſentſtunt· min h̾ze erkrachē·
gůt gebarē· da bi wol geſtaltē lib·
hat dc mīnekliche wib· dú min kan varē·
ſi iſt d̾ wūſch vf erde ſich̾liche·
froͤidenriche· iſt ſi doch mit reht̾ zuht·
in weis niend̾ wibes fruht· dú ir geliche·
Si iſt voꝛ valſche wol behůt·
div mich ſingē tůt·^{[WS 4]}

Do ir ǒgē· ſantē mir ir loſen blik·
ſa zehant d mīne ir ſtrik· warf an mich tǒgē·
guͤtlich gruͤſſen· wart mir an d̾ ſelbē ſtvnt·
ſit wc ie min h̾ze wūt· vō d̾ vil ſvͤſſen·
ſi hat mir dē ſtrik noh niht enbūden·
vn̄ die wūdē· vngeheilet· we mir we·
da vō ſoꝛge ich wieſ erge· zemanigē ſtvnden·
Si iſt voꝛ valſche wol behůt·
div mich ſingē tůt·^{[WS 5]}

Anmerkungen (Wikisource)

1. Vorlage: kumieret.
2. Vorlage: Si iſt voꝛ valſche·
3. Vorlage: Si iſt·
4. Vorlage: Si iſt·
5. Vorlage: Si iſt voꝛ valſche·.