Swas hv́re von des meijen gabe was so spehe

Swas hv́re von des meijen gabe was so spehe·
das es lihte sv́nde enphie dvr sine glanzen wehe·
das wil nv twingen·
winter zen dingen·
das es im der hofart stet zebůse^{[WS 1]}·
des hat dv́ heide sich begeben· in grawen erden·
so ist dv́ vrigemv̊te lerche· demvͤtig worden·
das in den lúften·
hohe dvr gv́ften·
weder sweibet vf noch singet sv̊zze·
froͤiden vnmv̊zze·
die ich von liebe gewinne·
irret mich zesange niht·
dis noh swas bi mir beschiht·
doch laze ich niemer·
ich diene ir iemer·
wip sint alr tvgende fuͤgerin·

Wip wol dir wol· dv́ lob werdú kreiatúre·
din gvͤte ist zů menschen heil· ein gralemezig stúre·
dv kanst vor smerzen·
vrijen ellú herzen·
die sich dienten ê· fúr sender eigen
dich hat dv́ welt· von anegenge hort angerbet·
der an selden richer gúlt· ist iemer vnverderbet·
das ist din ere·
div ist so here·
das nie lob· ir zehenden moͤhte erzeigen·
dir sol sich neigen·
swas hat zů froͤiden begirde·
wan swelch wip von rehter tât·
teil an dinem namen hat·
die sol man prisen·
got den werk wisen·
meister zeren vnd in ir hohen wirde·

Nv rihtent swes geburt ie wart von reinen wiben·
minne klagt man wele si· von tůschen landen triben·
mit dem gesange·
den si nit lange·
hoͤren wil vs als vnwerden mv́nden
wer sol danne· wie es mv̊t gesteten· gegen minne gvͤten·
wer sol ǒch von valschen mannen reinv́ wip behvͤten·
minne des waltet·
der si behaltet·
dem gebrist nit an solichen fvnden·
doch wil ich kvnden·
wie man ervarn welr wande·
swer getragener kleider gert·
der ist nit minne sanges wert·
die sol man stillen·
dvrh minne willen·
wan ir minne sang ist wibes schande·

Anmerkungen (Wikisource)

1. Vorlage: zeboͤſe.