Swem von liebe frv́ntlich meinen si beschehen
[282r]
Swem von liebe frv́ntlich meinen si beschehen·
der froͤwe sich so lieb geschehener sachen·
mir ist des zesinne vnd· wil sin iemer iehen·
es mv́ge vil froͤide an recht gemv̊ten man wol machen·
swer von liebe ie soͤlher wunne teil gewan·
vnd er das mit zv́chten tǒgen tragen kan·
secht der dvnket mich zer welt ein selig man·
vnd sol im wol von schulden alles truren swachen·
Hette ich sender man ie soͤlhes liebes icht
von eines herzen lieben wibes gvͤte enpfangen·
so hette ich bescheidenlicher froͤiden pflicht·
ǒwe nv mv̊s mich maniger schoͤnen zit erlangen·
sit das ein wib ze liebe mir er kôs|
das ich noch von ir sten alles liebes blôs·
we· wer koͤnde mir an froͤiden sin genos·
ob mir von herzeliebe icht liebes were ergangen
Selig[WS 1] wib ich bin noch gar der selden arn·
das mir von dir ie wurde ein kleines vngemvͤte·
des la mir vil sendem manne wider varn·
lieblicher dingen etteswas von diner gvͤte·
sich so wirde ich aller froͤide wol gemeit·
vnd in hohem mv̊te wuͤtend âne leit·
vnd ie doch mit fv̊ge inder bescheidenheit·
so das ich diner eren niemer missen huͤte·
Anmerkungen (Wikisource)
- ↑ Vorlage: Helig.