Swenne der mane ringet
[414v]
Swenne der mane ringet·
dc er heisset [415r] meie·
so ist dú zit vol wunne·
so gros ist maht·
helfe git die sinne·
dc kle gras vf dringet·
froͤide manger leie·
kvmt tag vnd naht
den vil werden·
die sich vf der erden·
froͤlich bilden·
froͤide schúhe die des niht getruwen dem vil milden·
got der alle die gewert·
wunne swer nach liebe gert·
sorge mv̊z in wilden·
Alle zwiuelere·
der froͤide ist verwassen·
der ist minne vnd ere·
niht lieb als dc gv̊t·
reine frowen here·
wúnschet in swere·
den vf zwiuels strassen·
die hant zwiuels mv̊t·
svnder zwiuel· der ein snodes zv́rnen niht vertribet·
sorgen wenken·
die des wol gedenken·
frowe ere belibe·
des ich froͤiden sicher bin·
mines herzen kv́nigẹin·
sorge von mir tribe·
Gvͤtlich ist ir gvͤte·
si ist wiblich gestellet·
gebe an ir persone·
durh lieht vnd klar
rot wis schone·
gemischet in bluͤte·
ist ir varwe gelich·
dc ist werlichen war·
lebt ich iemer·
ich gesvnge niemer·
halb ir wirde·
sit zwo gůte· frowen wol gemv̊te· si ist dú vierde·
sint ir tvsent si ist ir ein[WS 1]
der nie laster mal an schein
dc ist rich zimierde·
Anmerkungen (Wikisource)
- ↑ Vorlage: eine.