Swer hinat der verholner minne hat gepflegen

Swer hinat der verholner minne hat gepflegen·
den wil ich warnen es ist zit·
der tag der schinet mir wol leide vf allen wegen·
es schadet ob er langer lit·
vnd wisse dc
es liehtet sere·
vf sinen lip vnd vf sins reinen wibes ere·
dú steter tugende nie vergas·

Vs svͤssem mvnde svͤsseklich ein selig wib·
vil schone vnd zúhtekliche sprach·
wahter min uil lieber frúnt getrúwer lib·
vns fuͤget michel vngemach·
dc weken din·
er ist mir schone·
der ie rang nach reinen werden wibes lône·
entslafen an dem arme min·

Als lieb als ú úwer ere si vnd ǒch sin lib·
son lânt sin slafen nv niht me·
do erschrak dc reine minnekliche wib·
si sprach so we dir tag owe·
dc dv einen man·
wilt von mir scheiden·
dc in kristenlichen landen noh in heiden·
wib so lieben nie gewan·