Swer mīnekliche mīne

Swer mīnekliche mīne·
mit mīneklichem liebe habe·
der ſol ſich des niht ſvmen ſo der tag vf gê·
ern twinge ſine ſīne·
ſines h̾zekliches liebes abe·
dvr dc ſin kv̄ftklichú vꝛoͤide werde als e·
ſo mag dú frúntſchaft w̾nde wol belibē·
ǒch ſint gewis ſwc mā wil v̾triben·
dc da dc wol vil lihte an dē ende wirt ein we·

Nv hoͤꝛe trut geſelle·
ſo ſpꝛach das wūnekliche wib·
wie nahe mir dc weken an min herze gat·
ich welle ſone welle·
ſo fúrhte ich dc din mīne mich
an froͤiden gar v̾derbe·
dú niht maze hat·
ich wene an mir dú maze welle vnmazē·
wilt dv mich alſo dike ſende lazē·
dc iſt eī ding dc mir dē lib niht lange lat·

Owe mins h̾zen h̾ze·
dú wilt mī h̾ze bꝛechē abe·
wā e dir iht geſchehe ſo mvͤſte mir geſchehē·
ein vnu̾heilet ſm̾ze·
da mā niht vúr gebietē kan·
ſuſ ſtet gegen dir min wille· des mv̊s ich v̾iehē·
da wart eī lieblich kvs nach h̾zeſere·
dar nach mit rehter guͤte in weis was mere·
da ſol mā nach gedenkē vn̄ niht geſehē·

Sol ich nv vō dir ſcheidē·
ſo mv̊s doh vngeſcheidē ſin
getrúwes h̾zē trúwe d̾ ich han gepflegē·
gegē dir ſit mīne vnſ beidē·
geſelleklich lieb erwarb·
ſo hat ih alles troſtes mich an dich bewegē·
mich kan niht wan din eines troſt getroͤſten·
ich bin dē beſtē ob dc wirt zem boͤſtē·
wirt mir vō dir niht h̾zeklicher trúwē ſegē·

Min froͤide mine ſīne·
min lib̾ mī lebē· mī ſelde gar
hat ſo din lieb in bandē dc ich dir niht mag·
entwenkē ſtet̾ mīne·
vn̄ alſo ſteter dc mir ie
din lieb din leit dī ſwere fv́r die mine wag·
nv la mich vꝛowe varn mit dinē huldē·
mir w̾e eī iar ein tag bi dir vō ſchuldē·
nv mag es hie niht mer geſin wol vf es iſt tag·