Swer tǒgenlicher minne pflege

Swer tǒgenlicher minne pflege·
der sol nv wachen·
wan es wil âne zwiuel tagen·
der růwe er sich enzit bewege·
er sol niht machen·
das man von im beginnet klagen·
ein scheiden wil mir wol behagen·
vil dike ein man von lieben sachen·
vil grossiv leit beginnet klagen·

Der rede ein schone wib erschrac·
ein vmbeuahen·
tet si ir gesellen do·
si sprach owe ich wene der tac·
vns aber wil nahen·
des bin ich sendes wib vnfro·
dú reine suͤsse wachte also·
dc grawe lieht si beide an sahen·
si forhten melde vnd ǒch den dro·

IR beider froͤide ein truren wart·
do si sich scheiden·
mv̊sten vnd der tag vf brach·
ein reine wib in rehter art·
mit hohen eiden·
ir libes im fúr eigen iach·
der ritter do mit trúwen sprach·
nieman kan dich mir geleiden·
der himel segen si din dach·