Swes mv̊t ze froͤiden si gestalt

Swes mv̊t ze froͤiden si gestalt·
der schǒwe an den vil gruͤnen walt·
wie wunneklich gekleidet·
der meie sin ingesinde hat·
von richer varwe in liehter wat·
den vogelin truren leidet·
vs hohen mv̊te mangen don gar rilich svͤsse wise·
hort man von in lvten klanc·
vor vs der nahtegalen sanc·
vf grvͤneberndem rise·

Von schulden mv̊s ich sorgen wol·
von froͤiden git min herze zol·
die wile ir grůs mir wildet·
dú min herze bi ir hat·
ach dc si mich in sorge lat·
got hat si so gebildet·
dc min herze niht enkan noh al min sin erdenken·
wie si schoner kvnde sin·
dv́ mīnekliche frǒwe min·
dv́ mir wil froͤide krenken·

Ach mīne suͤsse ratgebin·
rât dc dv selig mvͤssist sin·
mins herzen kúnigīne·
rat dc si mir tů helfe schin·
rat dc si wende minen pin·
vnd mīneklichú minne·
sit dv slos bist vnd bant mins herzen vnd der sinne·
so rât ia dest an der zit·
min trost min heil gar an dir lit·
in diner glůt ich brinne·

Mv̊s ich nv scheiden svs von ir·
dc ich ir hulde gar enbir·
owe der leiden verte·
die danne gegen púlle tv̊t min lib·
genade seldenriches wib·
wis gegen mir niht so herte·
senfte ein dinen mv̊t vnd sprich vs dinem mvnde·
zv̊ mir niht wan eht fúnf wort·
die hoͤhent miner froͤiden hort·
var hin ze gv̊ter stvnde·

In gv̊ter stvnde si din vart·
din lip din sele si bewart·
din lob din heil din ere·
mac dich erwenden min gebot·
min vlen min drǒ dc weis wol got·
so wil ich bitten sere·
sit dc din vart vnwendig ist so fuͤrest zwei herze in arbeite·
dc mine vnd ǒch dine hin·
da von ich iemer trurig bin·
nv si krist din geleite·