Ualscheloser minne kraft

Ualscheloser minne kraft·
trage ich einem wibe·
stille vnd âne ir wissent manige stunt·
da bi tůt mich kumber haft·
an můte vnd an libe·
das ich irs nit tar gemachen kunt·
si ist der eren alse riche gar·
vnd hat ir so wunder·
das mich das tůt under·
so das ich genenden nit getar·

Dannoch ist ein ander not·
das ich der engelde·
soͤlher vorchte wirt ich niemer vri·
das ir lieblich munt so rot·
mich vs zorne melde·
swie guͤtlich er doch gestellet si·
secht dv́ vorchte tůt mich ǒch verzagen·
das si nit wirt inne·
miner steten minne
die ich ir lange tǒgen habe getragen·

Alsus ist dv́ liebe mir·
sunder valsch mit trúwen·
lieb das sis nit weis noch nie bewant·
dise liebe wil ich ir
iemer gerne núwen·
was danne ist min liebe ir nit bekant·
vnd ob mir dar vmbe we geschicht·
dulde ich da von smerzen·
libes vnd herzen
doch minne ich si deste minre nicht