Vil ſelic wart er ie geboꝛn

Vil ſelic wart er ie geboꝛn·
dē diſú zit genedeklich zergat·
ân aller ſlahte ſenden zoꝛn·
vn̄ er ein teil darvnder ſines willē hat·
wie dē nahet manic wūneklicher tac·
wie lútzel er mir ſelic man gelǒben mac·
dc ich vf soꝛge bin v̾daht·
vn̄ wirde ǒch niemer rehte fro·
mich hat ein lieb in trurē bꝛaht·
dc iſt vnwendig nv ſi alſo·

Das ich min leit ſo lange klage·
deſ ſpottent die den ir gemvͤte hohe ſtât·
wc iſt in lieb dc ich in ſage·
wc ſpꝛichet d̾ vō froͤidē der deheine hat·
wolde ich liegē ſoſt mir wūders vil geſchehē·
ſo truge ab̾ ich mich an not ſolt ich des iehē·
wā lânt ſi mich erw̾bē dc·
danach ich ie mit trúwen ranc·
ſte iemē danne ein lachē bas·
dc gelte ein ǒge vn̄ habe er doh danc·

Ich wil vō ir niht ledig ſin·
die wile ich iemer gernden mv̊t zer w̾lte han·
daſ beſte gelt der froͤidē min·
dc lit an ir vn̄ aller miner ſelden wan·
ſwēne ich dc v̾lúſe ſone han ich niht·
vn̄ enrůche ǒch fúr den ſelbē tac· ſwas mir geſchiht·
ich mac wol ſoꝛgē vmb ir lebē·
ſtirbet ſi ſo bin ich tot·
hat ſi mir anders niht gegeben·
ſo erkēne ich doch wol ſende not·

Genade iſt endeliche da·
dú erzeige ſich ob es an ir genadē ſi·
ich v̾ſv̊che es niender anderſwa·
vō ir gebotte wil ich niemer w̾den fri·
dc ſi da ſpꝛechent vō v̾loꝛner arbeit·
ſol dc der miner einú ſin dc iſt mir leit·
ich wande niht do ich ſin began·
ich geſehe an ir noch liebē tag·
iſt mir da miſſelvngē an·
doch gab ichſ wol als es do lac·