Wafen minne wie haſt dv mir ſo getā

Wafen minne wie haſt dv mir ſo getā·
ſolhen růf vn̄ klage ich noͤte vō dir han·
wan dv wiſteſt mich von des vngemach·
vnd riete des iſt lange mir an ein wib·
das ich dar er gab· das herze vn̄ alle den lib·
we was ich do troſtes mich ze dich ver ſach·
dar dient ich ſit das ich min ſtete nie zerbꝛach·
ǒwe leider das hat mich v̾uangen nicht·
wan das man mich trurig vnd verdoꝛben ſicht·
da von das mir helfe nie von dir beſchach·

Nv trachte minne ob ich von dir dur not nit klage·
wa iſt min froͤide hin vn̄ mine beſten tage·
deſt ane allen dank von dinen ſchulden vúr·
Got weis wol das ich mich nit verſinnen kan·
ſit das ich mis liebes minne alreſt began·
daſ ich das mit keinen ſachen ie ver lur·
daſ ich gegen ſteter minne· ſo wernd vnliebe ſpúr·
minne woltoſt dv mir noch ze ſtatten komen·
ſwie groſſen ſchaden ich din̾ ſinne habe genomen·
wie gerne ich vf beſſerunge das verkúr·

Frǒwe minne ich wil dir noch getrúwen bas·
hilf dur dine guͤte mir erwerben das·
das mich dv́ liebe ir minne in ſolher mâſſe wer·
das ich ir lieb echt inrēt halb des^{[WS 1]} h̾zen ſi·
vn̄ ſi wilent tuͤge frúntlich gruͤſſen bi·
vn̄ ich ir libes minne vf ir genade enber·
ſi muͤſſe mich vergen ob ich ir anders ger·
lieb voꝛ allem liebe ſelig vrǒwe min·
dur dine tugent ſo tů mir ſoͤlhe minne ſchin·
der bin ich din ſwie dv mir ſiſt ze vollem wer·

Anmerkungen (Wikisource)

1. Vorlage: des des.