Wafen si geschrijet

Wafen si geschrijet·
dc der leide winter kalt·
bringet sorge manicvalt·
kleinen vogelin blv̊men vnd ǒch mir·
des bin ich gefrîjet·
vor dien hohsten froͤiden min·
ich wil aber iarlanc sin·
bi den senden wie kůme ich verbir·
dc ich die vil gůten niht ennenne·
ich nenne si wenne·
mvgt ir fragen sa zehant·
iezent so wirt si genant·
nein es fuͤget weder mir noch ir·
frowe mache· dc mir swache·
leitlich sache· lache mir vnd dir·

ICh wil fúrbas singen·
vf genade vnd dvr ir zvht·
suͤsse richiv reine fruht·
miner trúwen la geniessen mich·
dv kanst swere ringen·
einer fraget lihte nv·
war vmbe ich dich heisse dv·
dast^{[WS 1]} von rehter liebe frowe sprich·
hab ich dar an iender missesprochen·
dc las vngerochen·
wan ich mac des lassen niht·
swc dar vmbe mir geschiht
als herzekliche minne ich dich·
Frowe mache· dc mir swache·
leitlich sache· lache mir vnd dir·^{[WS 2]}

FRowe kúniginne·
vberliep^{[WS 3]} vnd vbergv̊t·
sol ich wesen vngemv̊t·
disen winter von dien schulden din·
dc nimt mir die sinne·
dv solt dich bedenken bas·
wan ich din noch nie vergas·
mit gedanken in dem herzen min·
ich han alles gv̊t von dir gesvngen·
nv ists^{[WS 4]} mir niht gelvngen·
da von ich dir dienen wil·
gar ane ende vnd ane zil·
alse stet min liebe hin gegen dir·
Frowe mache· dc mir swache·
leitlich sache· lache mir vnd dir·^{[WS 5]}

Anmerkungen (Wikisource)

1. Vorlage: dc.
2. Vorlage: Frowe mache· dc mir ſwache·
3. Vorlage: vberlip.
4. Vorlage: iſt.
5. Vorlage: Frowe mache·