Wafen wie bin ich gescheiden

Wafen wie bin ich gescheiden·
von der lieben die ich da minne·
wafen wie habe ich gevarn·
des lebe ich in senden leiden
si hat herze vnd al die sinne·
der mv̊s ich mich gar enbarn·
ich enmac niht fro gesin·
si hat dort min herze in banden·
des lide ich in froͤmeden landen·
von ir schulden senden pin·
 
Sehe ich die vil minneklichen·
noch in rehter liebe lachen·
seht so wurde ich hochgemv̊t·
wc da sorgen mv̊s entwichen·
si kans alse sv̊sse machen·
dc es mir gar sanfte tv̊t·
in enmac ir niht gesehen·
vor gebirge vnd vor der verre·
nieman frage was mir werre·
ir mvgenz ane frage spehen·

IN gesach dast ane lǒgen·
nie so liehtevarwe wangen·
noch so roselehten mvnt·
noch so lieplich spilndú^{[WS 1]} ǒgen·
des mv̊s mich nach ir belangen·
so ist mir leider gar vnkvnt·
ob ir herze iht iamers trage·
nach mir als nach ir das mine·
nein si mehte so scharpfe pine·
iht verdulden zwene tage·

Anmerkungen (Wikisource)

1. Vorlage: ſpilnden.