Walt heide anger vogelsingen

Walt heide anger vogelsingen·
sint verdorben von des kalten winters zit·
da man blv̊men sach vf dringen·
da ist es blos nv schǒwent wie dú heide lit·
dc klage ich so klage ich mine swere·
dc ich der vnmere·
bin der ich gerne lieb in herzen were·
frowe minne dc ist alles din gewalt·

Bar min herze ie^{[WS 1]} bernder wunne·
dc wc swenne ich sach ir wunneklichen schin·
vnd ir ǒgen sam der svnne·
dvr min ǒgen lvhten in dc herze min·
dar nach wart mir leit in kvrzen stvnden·
owe minne wunden·
wie hast dv sus dich^{[WS 2]} min vnderwunden·
dc ich sender siecher bin noch froͤiden bar·

Bant dú minne mich der svͤssen·
vnd lat die vil lieben svnder truren gan·
minne wie wilt dvs gebvͤssen·
minne ich hans da für^{[WS 3]} es si niht gv̊t getan·
minne hilf enzit ich mv̊s verderben·
vnd an froͤiden sterben·
sol ich niht den roten kvs erwerben·
so ist mir froͤiden straze in rúwen pfat gebant·

Los in rehter wibes gvͤte·
sach ich zeinem male ir kúschen wibes lip·
da von froͤit·
sich min gemvͤte·
dc ich dâchte ia dv reine selig wib·
dv maht mir wol minen kvmber wenden·
vnd helfe senden·
frǒwe minne troͤstent mich vil senden·
wan ich stan von úweren schulden froͤide los·

 Wer kan mich nv fro gemachen·
nieman dan ir minneklicher roter mvnt·
will mir der von herzen lachen·
da von wirde ich sender siecher wol gesvnt·
gv̊ten wip nv winschet dc dú here·
mich die strâsse lere·
wa ich vsser leide in liebe kere·
minne hilf das mich dv́ liebe ir liebe wer·

Anmerkungen (Wikisource)

1. Vorlage: in.
2. Vorlage: dich′′ ſus′′.
3. Vorlage: fú.