War kan úwer schoner lib

War kan úwer schoner lib·
wer hat úch selig vrǒwe den benomen·
ir waret ein wunnecliches wib·
nv sint ir gar von úwer varwe komen·
dast mir leit vnd mvͤt mich sere·
swer des schuldig si den velle got vnd nem im al sin ere·

Wa von solt ich schone sin·
vnd hohes mv̊tes als ein ander wib·
ich han des willen min·
niht mere wan so vil ob ich den lip·
mag behvͤten vor ir nide·
die mich zihent vnd machet das ich einen riter mide·

Solke not vnd ander leit·
hat mir der varwe ein michel teil benomen·
doch frǒwet mich sin sicherheit·
das er lobte er wolte schiere komen·
weste ich ob es also were·
so engehorte ich nie vor maniger wile mir ein liebes mere·

Ich gelache in niemer an·
kvmt mir der tag dc in min ǒge ersiht·
wand ichs niht verlassen kan·
vor liebe dc mir also wol geschiht·
ê ich danne von im scheide·
so mag ich sprechen gen wir brechen blv̊men vf der heide·

Sol mir disú sumerzit·
mit manigen liehtem tage also zergan·
dc er mir niht nahen lit·
dur den ich alle ritter han gelan·
owe danne schones wibes·
son kam ich nie vor leide i grosser angest mines libes·

Mine frúnde mir dike sagent·
vnd liegent das min niemer werde rat·
wol in dc si mih so klagent·
wie nahen in min leit ze herzen gat·
swenne er mich getroͤstet eine·
so gesiht man wol dc ich vil selten iemer iht geweine·