Was hat mich vf si gebunden

Was hat mich vf si gebunden·
vnd ich ir so verre bin·
do si min gedanke funden·
sa zehant bant die min sin·
min moht ir niht entrinnen·
min herze mvͤze ǒch si minnen·
moͤhte ich vliegen als ein sneller valke ich wolte ǒch da hin·

Ich sant vs dvr aventúre·
wilde gedanke in dú lant·
do bekam in dv́ gehivre·
die tet er dem sinne erkant·
der lie si min herze schǒwen·
do erkvrn sú si ze frowen·
mit gemeinem mv̊te· minne slôz si zů ir sa zehant·

Moͤhten siv sich doch entsliessen·
wc ob eines danne enwil·
nein sú enmag da niht verdriessen·
sú hant kurzewile vil·
wan si wúnschent suͤsiv mere·
dc dú liebe bi mir were·
ald ich bi ir· dc ist in ein wunnebernde froͤide spil·

Was wil si da mit gewinnen·
dc si froͤide swendet deme·
der ir niemer mag entrinnen·
ich fúrhte es ir missezeme·
ich wc vri nv bin ich eigen·
si mag mich· wol weinen sweigen·
swc si wil dc tv̊n ich· wan dc ich ein ander frowen neme·