Was verzagten herzen hat min lip

Was verzagten herzen hat min lip·
das ich ir nie gesagte noch den willen min·
dú mir lieber ist danne ellú wib·
vnde iemer mv̊s vnendelichen lieber sin·
ich singe ir alle mine tage·
deswar des besten so ich mich versinne·
sine weis aber dc ich von ir sage·
vnd dc ich si so herzecliche minne·
mit der not trute ich ie mins herzen kv́niginne·

Ich hete ir doch vil lihte ein teil geseit·
der vil grossen liebe so min herze an si hat·
wan dc mich ir vil hohú werdekeit·
niht an ir vollekomen lib genenden lat·
ir ere vnd mine schamriches gern·
hat an vns nv das froͤmden gar gemachet·
des mv̊s ich maniger froͤide enbern·
dc si mir von herzen selten lachet·
vnd doch min ǒge in ir namen alse dike erwachet·

Swenne ich bi der hohgemv̊ten bin·
dú mir ane ir wissende nimt die sinne gar·
so nement ir spilnden ǒgen hin·
swas ich vf genade solte sprechen dar·
sol ich die langen svͤssen not·
nach minen willen iemer iht verenden·
ich mv̊s vnd mv̊s wer es min tot·
mins herzen bete ein wort an si genenden·
sit min leit niht wan ir minne kan erwenden·

Getorste ich iv mins willen sagen·
frǒwe al dar nach mich úwer minne twinget·
so moͤhte ú wol min sprechen klagen·
vil manige not da mit min herze ringet·
da von das ir mir lieber sit·
danne ieman in der werlte si·
vnd iv min leit so verre lit·
dc mir da wont so nahen bi·
des wintert mir dú svmer zit·

IR svlnt mir selig vrowe ein wort·
vernemen genedeclich ob irs gerůchent·
ich bin bekvmbert hie noch dort·
mit valscher minne als es die valschen sůchent·
ich minne úch vnd mint úch ie·
dc svlt ir wol gelǒben gar·
ir sit mir vor in allen hie·
da man des herzen wirt gewar·
dar an vernv́ gert ich nie·

Were an der minne valsches iht·
da mit ich iv mins herzen frowe meine·
son enzeme ǒch iv min singen niht·
hete^{[WS 1]}
iemen mere ein wort mit iv gemeine·
mir hat ǒch alle vnstetekeit·
Frowe úwer werder lib benomen·
swas iv min sanc des willen seit·
dc ist im von dem herzen komen·
gelǒbet ir dc so enhabe ich leit·

Ich wil singen vnd lachen·
swanne ich sihe dú mich betwungen hat·
ir genade mir mv̊s wachen·
sol der minen sorgen werden rat·
si sehent min ǒgen· dast vnlǒgen·
die ich lieber han danne alder kriechen bǒgen·

Si ist mir lieb ane alle vnstete·
wan sin wart nie valscher minne wert·
gerne ich ir genaden bete·
der ich ie mit trúwen han gegert·
in ir gewalden mv̊s ich alden·
vnd wil an ir min trúwe also behalden·

Lieber hete ich von ir lone·
niht wan ein vil kleines vingerlin·
danne dc rich vnd ǒch die krone·
mit der fúrsten willen were min·
der ist doch kleine· wan min eine·
die des wenen dc ich si mit trůwen meine·

Minnekliche ich von der minne svnge·
londe si mir mines sanges bas·
dc mir eteswenne wol gelvnge·
wolte si bedenken minne bas· dc ich bin·
der ir vil menge stvnde· lob gehohen kvnde·
lies eht si beliben a minen sin·

Ich wil nv dien wol gemv̊ten singen·
dien noch rehte froͤide sanfte tv̊t·
wer sol dien v́zagten froͤide bringen·
die man selten vindet wol gemv̊t·
lat ir mich den gv̊ten froͤide machen·
die doch gerne lachen·
lat die valschen trurens nieten sich·

Hohte nv der wol gelopten gvͤte·
minen mv̊t der ie nach froͤiden streit·
so lies ich vil trureklich gemvͤte·
dc mir schadet an miner werdekeit·
hoher mv̊t der lat vil selten sorgen·
der ist mir verborgen·
ob si niht genedeklichen tůt·

Wol mich des tages vnd ǒch der zit·
dc mir von der seldenrich also beschach·
dú mir da ze herzen lit·
dar nie gv̊tes wibes ǒge in me gesach·
da reht in mins herzen kraft·
lebet dv́ werde schone· mit gewaldes crone·
dc tv̊t mir der minne meisterschaft·

Der minne manicvalde rat·
riet mir selig frowe an dinen werden lip·
dvrh das din reines herze hat·
ganzer tvgende me danne in der werlte ein wib·
frowe ich bin din steter wer·
libes vnd sinne· so dc ich dich minne·
mer danne iema valsch minne ger·

Ja bin ich valscher minne fri·
wider dich frǒwe al mins herzen selekeit·
vnd dc dú liebe stete si· die wile ich lebe·
so hat mir min sin geseit·
ich wil frǒwe in minen tagen·
dich mit trúwen meinen· dich lieben dich reinen·
dc sol mir din hoher mv̊t vertragen·

Min tvmbes sendes ouge sihit·
leider selten dc min herze minne gar·
dc ist din lip vnd anders niht·
der mich frǒwe machet dike missevar·
ich mv̊s leider vnd sol· dur der lúte niden·
dich zesehenne miden·
das tv̊t mir we vnd niender wol·
Ich enweis wc ich dir anders sage·
wan dc ich dich minne vnd iemer minnen mv̊s·
min meiste not vnd al min klage·
ist dc mich so selten froͤit din werder grůs·
des trage ich vil manig ǒwe·
nahe mir verborgen· ich bin tvsent sorgen·
dvr din frǒmden richer nv danne ê·

Mir seit ein ellender bilgerin·
vngevraget von der frǒwen min·
wie si schone were· vnd da bi wol gemv̊t·
dc ist mir ein mere·
dc mir an den herzen sanfte tv̊t·

Got der gebe der lieben gv̊ten tag·
der ich anders niht gegruͤssen mag·
also spriche ich iemer·
wider den morgen frů·
vnd v́gisse ir niemer·
wider den abent gv̊ter naht dar zv̊·

Miner sinne ich halber da vergas·
do ich vrlob nam vnd si so sas·
si bran vf schone· sam der abent rot·
wirt mir iht ze lone·
dast vnder snitten gar mit sender not·

Si bat mich do ich ivngest von ir schiet·
dc ich ir sande minv́ senden liet·
die wolte ich ir senden· nv enweis ich bi weme·
ders ir wissen henden·
schone bringe vnd mir zeboten zeme·

Was ob mich ein botte versvmet gar·
ich wil me danne tvsent senden dar·
so si ir alle bringent· den vil svͤssen sang·
vnd in ir schone singent·
so wirt mir vil ihte ein habedanc·

Ich wil in miner frǒwen namen·
loben vnd eren iemer ellú wib·
wand si mit gv̊tes wibes schamen·
wol bekleidet hat ir hoͤveschen lip·
des hat si gar den besten pris·
maniger werder tvgent des wer ich gerne ir amis·

Ir amis hîesse ich gerne also·
dc mir ir genade were bi·
vnd si mins heiles were fro·
seht so wurde ich niemer selden fri·
wan nimt si selig wib des war·
das min sinne vnd min senden ǒgen merkent dar·

Min merken dc ist gar verlorn·
wan sin weis noch enfraget miner not·
ǒch fúrhte ich ir gewaltes zorn·
wirt ir scham von miner bete iht rot·
min zvht wart nie gegen frowen balt·
so ich des engelden so geschiht an mir gewalt·

IR gewalt der ich eigen bin·
git mir ane ir wissende senden mv̊t·
wolde si mines heiles gernde sin·
nieman dvnket alle ir lob so gv̊t·
swies minen willen nie gesprach·
si ist mir lieb vnd lieber danne iht des ich ie gesach·

Owe das ichs mit der lieben ie begvnde·
vnd owe das ich si îe gesach·
si hat mir gesprochen vs ir roten mvnde·
eines dc mir in min herze brach·
des kan mit niht werden rat·
es hat sich gesenket also hin ze grvnde·
dc min froͤide nach ein ende hat·

We wes hat sich dú liebe an mir gerochen·
oder wie han ich gedienet dc·
das si hat so vil der froͤide an mir zerbrochen·
vnd ich ir mit trúwen nie vergas·
dan enwas ich ir niht wert·
we wc han ich tvmber man mich so versprochen·
das ich gv̊tes wibes han gegert·

Ich wil gegen der lieben singen vmb ein scheiden·
vnd wil doch noch sand ir teilen ê·
also han ich geteilet schiere vns beiden·
ir si wol so si mir iemer we·
si habe ir dc herze min·
so belibet mir dc ich in senden leiden·
iemer mv̊s bis an min ende sin·

Ich wande ie dc ich ein teil der werlte were·
nv habe ich die wârheit wol ersehen·
das ich bin der lieben also gar vnmere·
We wie koͤnde leider mir geschehen·
mih betrǒg ein tvmber wan·
owe tot dast ie so lange mich verbere·
sit ich selber min gespottet han·

Owe was froͤideloser zit ein man verswendet·
der nv minnet als ich tv̊n ein wib·
si hat mit ir schoͤne hohe mih gepfendet·
ǒ we wan wist ǒch nv ir reiner lip·
in min herze eht alse gar·
so wurde es nach minen willen so verendet·
des ich sus gedenken nien getar·

So dú nahtegal ir sang·
núwet gegen der svmerzit·
vnd es svnder rifen dank· alles gruͤne in vroͤiden lit·
so manent mich die liehten tage·
miner alten senden klage· ǒwe minne dc din rat·
mir den kvmber ie gebot· vnd mich din helfe lat
verderben dc ist mir ein not·

Not vnd angest sint da bi·
swa dîv minne vf trúwe stat·
der enwirde ich niemer vri·
wande si gar von herzen gat·
die ich gegen der lieben han·
svnder valsch vnd valschen wan·
Als mis heiles oster tag· dest ir vollekomener lib
dú mich wol getroesten mag
bas danne in der werlte ein wib·

IR wol erenriches leben·
die ich da minne vnd miden mv̊s·
hat mir sorgen vil gegeben
der mir niemer wirdet bv̊s·
han ich von ir reinen sitten·
froͤide ein teil dar in gesnitten·
so ist ie doch des einen me·
wand ich vngetroͤstet bin·
es tůt ir froͤmden mir so we·
vnd verderbet mir den sin·

Ist dc ich verderben sol·
von ir vngenaden gar·
so tůt mir doch von herzen wol·
dc min trúwe ie diente dar·
vnd iemer g̾ne diene wil·
die wile ich lebe vnz vf dc zil·
endet si min vngemach· niwan den truwen min·
seht so wirt min truren swach·
dc mv̊s doch min gedinge sin·

Si sol wissen dc dú not·
mir naher danne ze herzen gat·
vnd ist mines heiles tot· ob si stete also bestat·
dc ich lange vremden mv̊s
verbirt mich danne ir werder grůs·
so gelǒbe dc min leit leider von ir meret sich·
des búte ich ir minen eit·
vil schoͤne nv bedenke mich·

Jvnge vnd alt ir helfent alle froͤide meren·
dc dú welt noch werde fro·
nieman kan fúr truren bessers niht geleren·
dc weis ich fúr war also·
volget swer iv gebe den rat·
da mit ir so grôssen froͤide mvget verkeren·
da dv́ welt mitte vmbe gat·

Wir sin besser fro so wir nach tvgenden ringen·
danne so wir trurenklichen leben·
fúr die sorge svln wir tanzen vnd singen·
disen rat wil ich iv geben·
Ich bin des gedingen vro·
dc mir an der lieben sol gelingen·
dú mich hat betwungen so·

Nieman kan mit sweren mv̊te·
niht verenden· ich bin vf genade vro·
selig wib ir sult an mich genade wenden·
so stet mir das herze ho· ir sit wol dar zv̊ gestalt·
dc ir mv́get in trurig herze froͤide senden·
vroͤiden vil habet ir gewalt·

Vrowe mir hat ivwer schoͤne vnde ivwer guͤte
trvren von dem herzen braht·
selig wib nv troͤste schiere min gemvͤte·
alle tage vnd alle naht· so vergisse ich úwer niht·
dar zv̊ wúnsche ich das dú selde úch wol behvͤte·
swie ich mir von ú geschiht·

Mich enwil der lieben guͤte niht erlassen·
ich betrahte ir werdekeit·
son enkvme ich leider niender ir ze mâssen·
si ist mir ze hoh ze breit·
doch mag ich des niht verlan·
si si iemer min geverte vf allen strassen·
dc ich ir niht vergessen kan·

Anmerkungen (Wikisource)

1. Vorlage: hete hete.