We was wnders lit an wibē

We was wnders lit an wibē·
ſit ir gvͤte kan vertriben·
ſendem herzen ſende not·
der in lieplich ſiht in ǒgen·
mit gewalde vn̄ da bi tǒgen·
dem iſt al ſin trvrē tot·
iſt im rehtv́ liebi bi·
ſo iſt beiden dāne wol·
minne tv̊t ſi ſoꝛgen fri·
ſi ſtriket beidiv herzen in ein
vn̄ wendet kv̄berliche dol.

Wib din minnenklich gebaren·
kan der ſenden h̾zen varen·
wip dv biſt ein ſvͤzer name·
wib dv kanſt wol froͤide meren·
wip dv kanſt froͤide leren·
dir iſt wiplich ere zame·
wib dv giſt ǒch hohen mv̊t·
wib dv giſt ǒch froͤiden vil·
wib dv biſt fúr truren gv̊t·
des mv̊s ich iemer ſelig ſin
dv biſt der welte wnne ſpil·

Heide vn̄ ǒwe ſtv̊nt mit bluͤte·
gegē des ſvͤſſen meigē gvͤte·
die ſint beide woꝛdē val·
dar zv̊ wil der wint̾ twingē·
cleiner vogelin ſvͤſſeſ ſingen·
das ſi ſwigent vber al·
das ſolt ich vō ſchvlden klagen·
ſo klage ich ein ander not·
ſolt aber ichs der lieben ſagen·
mich iamert nach ir mīne me
danne nach den liehten roſen rot·

Svͤſſe minne mine ſinne·
iamert nach der lieben mīne·
minne hilf eſt an der zit·
minne dv kanſt trvren ſwenden·
hohgemvͤte in herze ſenden·
mīne din gewalt iſt wit·
mīne ich bin dir vndertan·
minne wis gewaltig min·
owe minne ſolt ich han·
ir mīneklichen wibes lip
ſo were min trvren gar da hin·