Wer sol mich zefroͤide spúren
[309r]
Wer sol mich zefroͤide spúren·
gen dem wunneklichen tagen·
sol mir hohgemuͤte túren·
dc wil ich dien gůten klagen·
ich weis wol es ist in leit·
ich wc ie den froͤide gernden mines dienstes vil bereit·
vn wer ǒch noh vil gerne·
mirst min lon gen der vil svͤssen
húre vnnaher danne verne·
Selderiche svmer wunne·
du solt lieben minen grv̊s·
swie froͤiden mir erbunne
doh wirt mangem herzen bůs·
von dir grosser swere vil·
da von ich dich suͤsser svmer willekliche gruͤssen wil·
vnd mv̊s doh froͤide enbern·
wan min lon ist gen der svͤssen·
húre vnnaher danne vern·
Ich mag wol min herze straffen·
dc ichs gegen ir began·
vf min ǒgen schrien wafen·
die von erst si sahen an·
ach do wc so schoͤn ir schin·
dc er kam dur ganzú ǒgen in dc sende herze min·
das [309v] mv̊s iemer nah ir gern·
swie min lon ist gen der suͤssen·
húre vnnaher danne vern·[WS 1]
Als ein swin in einem sake
vert min herze hin vnd dar·
wildeklicher danne ein trake·
viht es von mir zv̊ zir gar·
es wil vs durh ganze brust·
von mir zv̊ der seldenrichen· also stark ist sin gelust·
we wie lange sol dc wern·
Sit min lon ist gen der suͤssen[WS 2]·
Húre vnnaher danne vern·[WS 3]
Nv si hat doch schoͤn vnd ere·
steimar swc an dir begat·
ganzer tvgende michels mere·
aller selden vollen rat·
an ir lit der wunsch vil gar·
wúnschet alle gůten lúte dc ich wol gegen ir geuar·
es gat mir dur ganzen kern·
das min lon ist gen der suͤssen[WS 4]·
Húre vnnaher danne vern·[WS 5]