Werder meije sit din schoͤne

Werder meije sit din schoͤne
liechter sumer
blv̊men vnd der vogellin doͤne·
selken kummer
nicht erwendent· der mir tůt so we·
von ir dv́ mich hat verderbet·
âne schulde·
si min froͤide hat ersterbet·
zwar ir hulde·
ist weger vil danne blůmen vnd kle·
ach si here vn troͤsterinne·
dv́ mir sinne·
hat entwendet gar·
des leb ich in vngewinne·
sit ich stetekliche in ir glůte brinne·
minne hilf en zit sit das ich sten genaden bar·

Owe miner ǒgen weide·
dv́ verborgen
ist· so stetelliche leide·
tůt mich sorgen
nach ir· dv́ mir ist vúr ellú wip·
selten ich ir han vergessen·
in dem můte
den si hêre hat besessen·
dv́ vil gůte
twinget ie ze sorge mir den lip·
secht des můs min herze erkrachen·
sam die spachen
tůnt in heisser glůt·
das kumt ie von soͤlken sachen·
das mich froͤmden wil· ir minnekliches lachen·
wachen· můs ich dicke in angestlicher sorgen flůt·

Ob ein wip sich noch bedechte·
gen mir armen·
das sich in ir herze flêchte·
selk erbarmen·
das an hoch gelopten vrǒwen liget·
tete das dú seldenriche
wandels eine
wa lebt iender ir geliche
die ich meine·
sit si stete núwer tugende phliget^{[WS 1]}·
liechter varwe clare bevlossen·
schoͤn entsprossen·
stet ir lobes ris·
iemer wer ich vnuerdrossen·
swenne ich se so lachelich ir munt entslossen·
schossen núwer rosen glesten· recht in selker wis·

Anmerkungen (Wikisource)

1. Vorlage: phligt.