Wie hohes mv̊tes ist ein man
[152v]
Wie hohes mv̊tes ist ein man·
der sich zv̊ herzeklichem liebe schoͤnem libe hat geleit·
zer froͤide ich niht gelichen kan·
mir ist ellú froͤide gar ein niht gegen dirre swas mir ieman seit·
swer sich so wunneklicher wunne wol fúr war gefrowen mag·
der hat die naht niht angest wan dc in vertriben sol der tag·
Geselleklicher vmbevang·
mit blanken armen svnder wan tůt sendes herze hohgemv̊t·
da wirt dc vngemvͤte krank·
swa minneklicher minne kvs so lieblich lieb an ander tv̊t·
Swer sich so wunneklicher wunne wol fúr war gefrowen mag·
der hat die naht niht angest wan dc in vertriben sol der tag·[WS 1]
Der tag mich leider hat betaget·
so selten nach der eren sige dc ich niht froͤide mag veriehen·
vil selig man der des niht klaget·
vnd im sin herze mag gesagen was im zeleide ist geschehen·
Swer sich so wunneklicher wunne wol fúr war gefrowen mag·
der hat die naht niht angest wan dc in vertriben sol der tag·[WS 2]
Der svͤze wehsel vnder zwein·
den werdú minne fuͤgen kan wie ruket der das herze enbor·
dú beide ir mv̊tes sint allein·
ich kan nah wunsche erdenken niht zer werlte selden dirre vor·
Swer sich so wunneklicher wunne wol fúr war gefrowen mag·
der hat die naht niht angest wan dc in vertriben sol der tag·[WS 3]
Der tag wil scheiden ritter wert·
von liebe lieb es mv̊s eht sin· wol vf laze ir dc herze hie·
dú din zefroͤide hat gegert·
si wil ǒch dir dc herze lan dú trúwen dir gewankte nie·
dv leist ǒch ir als es din werder lip vil wol geleisten mag·
mit schiere komene es mag niht lenger hie gesin ich sihe den tag·