Wie sol ich selig wib

Wie sol ich selig wib·
den lúten nu gebaren·
dc ich muge ir nach rede gestillen·
sit dc in sin noch lip·
niht kan geliche varen·
dc ir doch viere heten einen willen·
nieman siht·
geliches iht·
in allen richen·
vint man niht zwei gelichen·

Er wer ein selig man·
der dc kvnde betúten·
was iegliches menschen herzen minne·
des ich leider niht kan·
wan vz der werlte lúte
vindet man niht zwene mit gelichem sinne·
zwein ein man·
niht dienen kan·
nieman in allen·
mag eben wol gevallen·

Wie sol ich danne leben·
dc ich mine zuht niht stoͤre
vnd doch die meisten volge nih vspete·
den rat sult ir mir geben·
wan ich dc dike hoͤre·
swer selbe enkan der sv̊che wise rete·
wiser rat·
vil volge hat·
swer volget wisen·
der mv̊s mit eren grisen·

Wisheit ist mir ze snel·
doch hoͤre ich wise sprechen·
dc gvͤtlich offen grůs ziere die vrowen·
demv̊t ist lobes hel·
ir trwe sol niht brechen·
sú son sich zúhteklichen lâssen schowen·
swacher rat
ze vinster gat·
tvgent sol glesten
den frúnden vnd den gesten·

Swel wib die sinne treit·
die valsch niht hat gemeilet·
dú wirt gepriset nach der wisen lere·
swa sich bescheidenheit·
in wibes herzen geilet·
dú zweiet vnd frúhtet selde vnd ere·
luter mv̊t·
ist wiben gůt·
scham ist ein krone·
dú zieret frowen schone·