Wol dem meien (Mit aufgelösten Abbreviaturen)

Wol dem meien·
wol der wunne·
wol der svmerlichen zit·
tanzen reien·
swer dc kvnne·
der ker vf den anger wit·
da svn wir den meien gruͤssen·
singen der vil reinen svͤssen·
dú kan machen·
herzen lachen·
singent alle widerstrit·

Wol ir henden·
wol ir wange·
wol ir húfeln rosen rôt·
getorste ich senden·
mit gesange·
minú leit der ich ie bot·
minen dienst mit gantzen trúwen·
den wil ich ir ierlich núwen·
dc dú reine·
die ich da meine·
scheide mich von sender not·

Wol ir ǒgen
wol ir mvnde·
dú gent liehter varwe schin·
swer nv tǒgen·
bliken kvnde·
den wolde ich die frowen min·
zeigen dc er si gesehe·
vnd er bi dem eide iehe·
dc si zware
in eime iare·
so schôn niht moͤht gebildet sîn·

Wol ir brawen·
wol ir kinne·
wol ir kel so lilien var·
ich mv̊s grawen·
ald ir minne
tvͤge mich an sorgen bar·
seht dem tůt si vngeliche·
dú vil reine selderiche·
we mir armen·
âne erbarmen·
diene ich ir mit trúwen gar·

Wol ir libe·
der so schone·
nach dem wunsche si bereit·
got nie wibe
gab die krone·
die si an ir libe treit·
svmer kleit hat er ir gesnitten·
selde vnd zvht nach wibes sitten·
hat dú reine·
die ich da meine·
dc si gar mit zúhten kleit·