Wol im der nv vêrt verdarp (Mit aufgelösten Abbreviaturen)

Wol im der nv vêrt verdarp^{[WS 1]}·
der hat hv́re sin leit verklagt·
der ie gerne vmbe ere warp·
vnd daran ist vnverzagt·
dem tv̊t vil meniges wê·
des sich iemer getroͤstet der der ist verdorben ê·

Man sol sorgen sorge ist gv̊t·
ane sorge ist nieman wert·
wol mich iemer das min mv̊t·
des so striteklichen gert·
des mich noch gemachet vro·
sol aber ich verderben son verdarp nie lobelicher man denne also·

Sorge vnd angest stat mir wol·
sit ich verdorben bin·
swas ich noch gesorgen sol·
des kvm ich mit froͤiden hin·
wer hat liep ane arebeit·
we was sprich ich ion toht zer werlte nit dienst ane selikeit·

Wie mag leit an mir gewern·
dem von liebe liep geschiht·
ich mv̊s leider froͤiden enbern·
liebes des enhan ich niht·
wan ein liep das min niht wil·
wenne sol ich lieben tac an dem geleben io getrúwe ich gar ze vil·

Min glǒbe ist sol ich leben·
ich wirde endelichen alt·
dv́ mir froͤide hat gegeben·
vnd sorge manigvalt·
der diene ich die selben tage·
mine iar dv mv̊zen mit ir ende nemen so mit froͤiden so mit klage·

Anmerkungen (Wikisource)

1. Vorlage: verdarpt.