Wol mich húte vn̄ iemer mere

Wol mich húte vn̄ iemer mere·
ſvmers vn̄ diner ſchonē zit·
zů der wūne han wir ere·
ſit ſin kvnft d̾ welte froͤide git·
ſwem ie h̾zeliebe wart bekant·
der wirt in der wūne maniger froͤide ermant·
wan ich ein̾ bin der noch nie troſt an h̾zeliebe vant·

Froͤite mich ein liebes mere·
ſo wêr ich den ſvmer âne leit·
dc ǒch dú vil ſeldebere·
mich gewerte des ſi mir v̾ſeit·
ſo froͤite ich mich aller blv̊mē ſchin·
vn̄ deſ ſvͤſſē meien ſang der vogellin·
der iſt mir truͤbe ſol ich vō der lieben vngetroͤſtet ſin·

Roſen rot gar mīneklich·
ſoſt d̾ liebē wēgel vn̄ ir mvnt·
ſi iſt ſo gar d̾ erē rich·
dc iſt mir ein ſeldericher vunt·
do bat ſi mich lâſſē mînē ſanc·
dc ich dar an erwūde ſoſt min froͤide kranc·
ſol min dienſt vn̄ min ſingē gegē ir ſin gar âne danc·

E das ich alſus erwinde·
ſo ſol ein min frúnt der liebē ſage·
ſit ich gůt gerihte vinde·
ſo wil ich dem kv́nige vō ir klagen·
dc ſi minē dienſt nam v̾gv̊t·
vn̄ ſi mir dar vnder troſt noch helfe tůt·
lât der kúnig dc vngerihtet ſo habe ich zem keiſer mv̊t·

So fúrhte ich wir mvͤſſen beide·
kēpfē ſwie wir fúr gerihte komē·
wā ſi lǒgēt bi dem eide·
dc ſi minē dienſt habe genomē·
mv̊s ich dāne vehtē daſt ein nôt·
kvme ich ſluͤge ir wengel vn̄ ir mvnt ſo rot·
ſo iſt ǒch laſter ſleht ein wib mich ane wer in kampfe tot·

Wiget der kúnig kv̊nrat dc ringe·
ſwēne ich kv́nde minú klagēdú leit·
ſchier ichs vúr den keiſer bꝛinge·
da wirt doch niht wol vō ir geſeit·
ſwie mir der niht rihtet da zehant·
ſo wil ich zedem ivngē kúnige vs dúringē lant·
alder an dē babeſt da man ie genade an rehte vant·

Lieber frúnt dú zúrneſt ſere·
dc dv keiſer vn̄ kúnigē klageſt·
vn̄ dē babſte vf min ere·
dir iſt beſſer das dv reht verdageſt·
nim die mīne dú gefuͤge ſi·
wis mir lāger noch mit dinem dienſte bi·
dir iſt mīne beſſer dāne reht ich bī deſ mv̊teſ fri·