Wol vf tanzen vb̾al

Wol vf tanzen vb̾al·
froͤit úch ſtolzē leigē·
wūneklichē ſtat d̾ walt·
wol gelǒbet dc ſint liebú m̾e·
iarlang pꝛuͤuet ſich d̾ ſchal·
gegen dē liehtē meigē·
da die vogel vb̾al
ſingent wol zergangē iſt ir ſw̾e·
alle vb̾ ein planúre·
die blv̊mē ſint entſpꝛvngē·
elliv creatúre
dú mv̊ſſe da vō ivngē·
wil ein wib ſo wirt mir wol nach d̾ ie min h̾ze hat gerungē·

Zergangē iſt d̾ leide ſne·
vō d̾ gruͤnē heide·
komē ſint vns die blv̊mē rot·
des froͤit ſich dú w̾lt ellú gemeine·
dar zv̊ viol vn̄ kle·
liehte ǒgē weide·
mt den wūnē iſt mir we·
dc kan niemā wendē wan alleine·
dú mich heiſſet ſingē·
der zimt wol dc lachen·
ſol mir wol gelingē·
dc mv̊s ir gvͤte machē·
vō ir ſchuldē mv̊ſſē noch tuſent h̾zen vn̄ dānoch mere erkrachen·

Dú mir an dē h̾zen lit·
die ſach ich ſo ſchone·
an einē tanze da ſi gie·
wol mit erē bi dē ſchonē frowē·
ich wart fro d̾ ſelbē zit·
got ir iem̾ lone·
dc ſi mich ſo wol enpfie·
ſolde ich ſi noch eineſt alſo ſchowē·
die vil tvgentrichē·
ſo w̾e mir wol zemv̊te·
ir kan niht gelichē·
vil ſelig ſi dv́ gv̊te·
nach ir mīnē iſt mir we· noch iſt dú w̾lt gar vngemeiner hůte·