Ze dienest ir von der ich han

ZE dienest ir von der ich han·
ein leben mit ringem mv̊te·
als ich nv lange han getan·
vnd gan es mir dú gv̊te·

dú mir tůt das herze min·
uil menger sorgen lere·
so wirt an mime sange schin·
dir winter noch dehein swere·

Ich wil si flehen vntz ich lebe·
dc si mir froͤide gvnne·
vnd si mir lon nach heile gebe·
si ist min svmerwunne·

Si feiget blv̊men vnd kle·
in mines herzen anger·
des mv̊s ich sin swies mir erge·
vil richer froͤiden swanger·

Ir gvͤte mich vil lútzel lat·
dekeinen kvmber mvͤgen·
alsam der heisse svnne tůt·
der schin der von ir ougen gat·
der tůt mich schone blvͤgen·

alsam der heisse svnne tv̊t·
die bǒme in dem tǒwe·
svs senftet mir den sweren mv̊t·
von tage ze tage min frǒwe·

Ir schoner grůs ir milter segen·
mit eime senften nigen·
dc tv̊t mir ein meigen regen·
rehte an dc herze sigen·

Des ist mir sanfter danne bas·
e mich verbere sehent dc·
ich trůge e alder werlte has·

Er mv̊get sich swer mirs erban·
ich si ir nie so froͤmde man·
ich erdringe ir mere lones an·

Sol ich dekeine wile leben·
mir wirt von ir vil lihte geben·
darnach ein keiser moͤhte streben·

Dc si mir vnderwilen tv̊t·
dc dvhte ein andern man vil gv̊t·
wan dc doch hoher wil min mv̊t·

dem ich geziehen niênen mag·
nv fúrhte ich eht der minnen slag·
ich erkennen nv vil mangen tac·

er tv̊t mir leides dike vil·
doh were ich gerne hin an dc zil·
da si da sol vnd lonen wil·

Nv wol hin es mv̊s eht sin·
vnd stige vf dc herze min·
ich wene ich iht engelt din·
Swenne ir zerehte wirdet schin·
dc ich lide disen pin·
von diner kvr vnd diner bete·
Vnd îe mit zúhten schone tet·
An wider wanc·
sit mich erranc·
ir minnen swanc·
in ir getwanc·
nv ist ze lanc·
ir habedanc·
dc tv̊t mich kranc·
des han ich mengen vngedanc·
dc lenget mir die kurzen tage·
vnd nv́wet mir die alten klage·
von der ich wande sin erlost·
nv wil ich noch ir genaden trost·

beiten als ich han getan·
ze heile mv̊sse es mir ergan·
in enwil ir niemer abe gestan·
doch troͤstet mich min tvmber wan·
ein gůt gedinge den ich han·
zer tvgenden der si vil begat·
dc si mich lihte niht enlat·
vs ir gewalt·
disen winter kalt·
so ist bestalt·
ich wurdes alt·
vnd sorgen balt·
vnd doch versalt·
ze manicvalt·
vnd were verlorn swas es noch galt·
Dc swachte sere minen mv̊t·
nv růche ich swc si mir getv̊t·
so lâsse ich niemer minen strit·
wc ob si in scheidet an der zit·

Si sol es lan·
vnderstan·
mit eteslichen dingen·
dc ist min rat·
Als es mir stat·
so enmac ir niht gelingen·
swie si behabe an mir den sige·
so wissent dc ich tot gelige·

Deswar si sol·
gedenken wol·
dc es ir niht enzeme·
ob si min leben
der ichs han ergeben·
an ir genade nême·
si mv̊s es iemer sv́nde han·
des sol dv́ gv̊te mich erlan·

Dú mac sin
gewaltig min·
dest reht ich bin ir eigen·
nv vil lange·
swen es ergange·
vnd ir gezeigen·
des solt ich wol gewinnen fromen·
dú gůte dv́ hat mir benomen·

minen sin·
der ich bin·
vndertan·
si rẘret mich an minen alten ban·
den mv̊s ich aber núwen·
ich hvpf ir vf der verte nach·
mich leit ir sv̊ssen ǒgen schach·

swar si wil·
doch hoͤre ich vil·
von frúnden vnd von mâgen·
warvmbe ich schine
in dirre pine·
es enmac mich niht betrâgen·
die wile ich weis in ir gewalt·
mines herzen trost so manicvalt·

der ich pflag·
mengen tag·
wie solde ich si verlassen·
er irret sich·
swer iemer mich·
darvmbe wil verwâssen·
er schiede e· mvsel in den rin·
e er von ir dc herze min·

gar enbv́nde·
es ist in sv́nde·
die mir niht gelǒbent·
der ǒgen blic·
mich vil dic
miner sinne rǒbent·
die fúrhte ich als den donrslag·
dem ich entwenken niene mag·

ob ich die schoͤnen mac gesehen·
in eime iare·
so enkan mir gv̊tes niht geschehen·
vor valscher lúte vâre·
die nement des war·
Ob mir iht liebes wider var·

Es ist ein wunder dc ich trage·
so kvmberliche swere·
alse dike so si miner klage·
mit genedeklichem mere·
antwúrte git·
so froͤit den toren zaller zit·
mit gv̊ten sitten·
ich wil si aber vnd iemer bitten·

Frowe habe genade min·
dc zimt wol diner guͤte·
la mich ir iemer einer sin·
der diner eren huͤte·
Als ich ie tet·
vnd das ich niemer fůs getret·
vs dime lobe·
ich gelig es vnder oder obe·

Si endarf niht merken dc ich strebe·
nach mines leides ende·
ich mv̊s es tv̊n die wile ich lebe·
han ich es missewende·
des enmac ich niet·
min herze nie von ir geschiet·
noch niemer wil·
es gelte lútzel oder vil·

Nieman darf des wunder nemen·
dc si mich hat gebunden·
ich enmac ir kreften niht gestemen·
so ist si obe so bin ich vnder·
swc ich nv tv̊n·
si hat beiaget an mir den růn·
ich mv̊s ir iehen·
nv wol eht doch· es ist noch· ie beschehen·

Alexander der betwanc·
dv́ lant von grosser krefte·
doch mvͤste er svnder sinen danc·
der minne meisterschefte·
sin vndertan·
vmb eine frǒwen wolgetan·
die er erkos·
er enwart ǒch niême sigelos·

In einen wilden walde er sach·
sines herzen kúniginne·
des mvͤse er liden vngemach·
er hete sinne sinne·
vil nach v́lorn·
dc ich die schonen han erkorn·
ze mime leben·
des wirt mir lihte ein lon gegeben·

Nv wil ich aber bitten·
die gv̊ten als ich kan·
dú mir mit schonen sitten·
vnd mir mit zúhten an gewan·
Von erst dc herze min·
dc si sich bedenken noch·
vnd rehter dinge pflege·
vnd minen dienst doch·
nach gv̊tem willen wege·
vnd mich ir lâsse sin·

gereit vnz ich nv lebe·
dan ich niemer swie es erge·
dag von ir gestrebe·
vnd dc iemer me·
mine not vnd dise pin·
den ich nv lange dol·
mit zúhten schone trage·
deswar ioch tůt si wol·
si endet mine klage·
vnd wirt ǒch verre schin·

ir gvͤte vnd ir mange tvgent·
der vil verborgen wurde·
solde ich verslissen mine ivgent·
vnder dirre sweren bvrde·

Swenne si wil ich bin gereit·
si gebe mir ein geleit·
fúr kvmber vnd fúr herzeleit·
dc ich ir ere si bereit·

swar ich des landes iender kome·
mit allen minen sinnen·
deswaR· da wahset an ir frome·
lat si michs lon gewinnen·

Ich enger niht grosser dinge zir·
wan trostes mime leide·
des han ich vil swenne ich enbir·
ir svͤsser ǒgen weide·

Nv seht ob es ein fůge si·
swer mir die verteilde·
ich solte ir offte wesen bi·
wer es an mime heile·

Min leben wirt mvͤlich vnd sûr·
sol ich si lange miden·
dc floris mvͤse dvrh planschiflur·
so grossen kv̄ber liden·

dc enwas ein michel kvmber niet·
wan si gros vngeverte schiet·
als es der alte heiden riet·

Si wart vil verre vber mer gesant·
des mvͤst er in mangú froͤmdú lant·
da er si in eime turne vant·

von gv̊ten listen wol behůt·
da waget er leben vnd gůt·
des gewan er sit vil hohen mv̊t·

Dc troͤstet mich vnd tůt mir wol·
von minem kvmber den ich dol·
es geschiht gar swc geschehen sol·

Si sol wol wissen ane wan·
swies mir darvmbe sol ergan·
wer si versendet zendian·

dar were min varn vil bereit·
dc mer dc lant vnd búrge treit·
dc enwer mir darzv̊ niht ze breit·

als rehte als ich si han erkant·
swer mir nv leidet disú bant·
der sv́ndet sich vnd ert den sant·

Er kerte den rin e in den pfat·
ê ich si liesse dú mich hat·
betwungen vnd doch schone stat·
von ir min herze swies ergat·
es dvhte mich ein missetat·
ob ich schiede alsus der von
si ist miner trúwen wol gewon·
vnde weis si gar·
swar ich var·
so mv̊s ich dar·
nemen war·
swenne ich getar·
vor einer schar·
ze nide gar·
vor der so mv̊s ich denken bar·
vnd hůten mich doch alle tage·
vil sere vor ir zvngen slage·
vnd vor ir vnrekante spehe·
doch wil ich dc si sehe· wc mir geschehe·
vnd wil dienen vf ir has·
wolde si noch gelǒben bas·

dc ich von ir niene wil·
dc were mir ein senftes spil·
mines kvmbere dest ze vil·
wc hilfet dc ob ich es hil·
io hat si mines lones zil·
gesetzet an wol tvsent iar·
ich mv̊s verderben dc ist war
min arbeit·
mich niht fúr treit·
mir ist verseit·
darnach ich streit·
min herzeleit·
dc ist ze breit·
dc ich e· leit·
min lon der ist noch vnbereit·
Ich wene wol mir si ze gach·
si giht alrerst wan si dernach·
vnd versaget mir in spotes wis·
deswar des hat si kleinen pris·
dc si mir git ze lone spot·
si mv̊s es iemer fúrhten got·

Swc si mir tůt·
dast alles gv̊t·
ich enmag ir niht entwenken·
Als es mir stat·
doch swies ergat·
so solte si gedenken·
dc es gvͤte niene zimt·
dc si mir gewerb vnd fuoge nimt·

Si sprichet dike·
dc ich erschrike·
froͤmdú wort von schimpfe·
si tůt verdrert·
swes si gert·
vor den lúten mit gelimpfe·
ich enmac mich schiere niht entstan·
wan ich der sinne niene han·

bi mir gar·
swar ich var·
so mv̊s ich in ir lassen·
des wirt wolt schin·
swenne ich den min
en morgen an den strâsen·
den lúten búte gegen der naht·
ich ziere die zit gar vngewaht·

Es ist niht wunder·
dc ich svnder·
minen danc si mide·
der ǒgen schin·
den kvmber min·
den ich nv lange lîde·
mit einem blike tůt verselt·
ich han mir si vil rehte erwelt·

Ir vert mit
der frǒwen sit·
de la roschi bisus·
die gesach nieman·
er schiede dan·
vro riche vnd wîse·
Ich wene wol ir si alsam·
wer moͤhte ir danne wesen gram·

Ich wil iv minen willen sagen·
mac ich der gv̊ten minne·
mit mime dienste niht beiagen·
dc ich niemer die sinne·
noch minen lib·
bekere· an dc kein ander wib·
swie ich mich erhol
der gedinge tv̊t mir also wol·

dc ich wol weis dc si mir gan·
ze diene vmb ir hvlde·
gewunne ich niht mere dran·
ich wil si der schulde·
niht en gehaben·
swer mir ze rehte solde staben
des einen eit·
ich swuͤre wol es were ir leit·

Sit ich der selde niene habe·
dc si mir sanfte lône·
ich enwil doch niht wesen abe·
ich werde erbunden schone·
als ichs ger·
ich mv̊s iemer wesen der·
der vmbe ir heil·
ir treit ein schones leben veil·

Turnus der wart sanste erlost·
Von kvmberlichem pine·
dc was sines herzen svnder trost·
dc er lag dvr lavine·
so schone tot·
der endet schiere sine not·
in eime tage·
die ich nv mange iar trage·

Ich weis wol soltes sin·
an dem gelúke min·
ir gvͤte dú ist so manicvalt·
si tete mich noh froͤiden balt·
ich enwas niht selden los·
do ich si mir erkos·
in disem vserkornen don·
vf gůten riche schonen lon·

Jedoch swie es mir erge·
so mv̊s si iemerme·
nach gote sin min anebet·
wan si niht wan got getet·
Ich ergibe mich vnd enbar·
an ir genade gar·
dc si mir darnach ich strebe·
ein wunnekliches ende gebe·