Zwo gespilen mere

Zwo gespilen mere·
begvnden sere clagen·
herzesende swere·
beide einander sagen·
dú ein zer ander sprach·
gros leit vnd vngemach·
benimet mir die sinne·
hie enist niht froͤiden inne·
sit ich mins liebes niht ensach·

Dú rede ist mir gar swere·
sprach dú ander do·
trut gespile mere·
ia wirde ich niemer fro·
ich han den man verlorn·
den ich hat vs erkorn·
fúr alle die dir waren·
er kan sich wol gebaren·
er wart zeleide mir geborn·

Dú dritte kan gegangen·
si sas hin zv̊ den^{[WS 1]} zwein·
si wart niht wol enpfangen·
si hiessen si gan hein·
ga hin da froͤide si·
wan wir sin froͤide fri·
dv maht wol froͤiden walden·
din lieb will dich behalden·
davon so bistv wol dir bi·

Nv sihe ich an úch beiden·
dc ir mir sint gehas·
ich wil hinnen scheiden·
fúr war sage ich iv dc·
ir hant mir dc geseit·
des ich bin vil gemeit·
wer kv́nde mir gedroͤwen·
ich wil mich iemer froͤwen·
min liep mir holdes herze treit·

Ich bin des worden innen·
an dem vil werden man·
als ich mich kan versinnen·
dc er mir gv̊tes gan·
ich bin im ǒch vil holt·
dc hat er wol verscholt·
ich spriche es bi dem eide·
er tet mir nie so leide·
er wer mir lieber danne golt·

Anmerkungen (Wikisource)

1. Vorlage:zv̊ den zv̊ den.