Doctor Brants Narrenschiff/Reuter und Schreiber

« Von gedrückten Narren	Sebastian Brant Doctor Brants Narrenschiff	Närrische Botschaft »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

[106v] Wenn rütter / schriber / gryffen an Eyn veisßten / schlechten / bürschen man Der muoß die leber gessen han Ruter vnd schriber Schriber vnd rüter / man ouch spott Sie sygen jn der narren rott Sie bgont sich nach mit glicher nar Der schyndt heimlich / der offenbar [107r] 5 Der wogt syn lib jnn druck vnd naß Der setzt syn sel jnns dinckten faß Der rüter stoßt vil schüren an Der schriber muoß eyn buren han Der veisßt syg / vnd moeg trieffen wol 10 Do mit er riechen mach syn kol Wann yeder daet als er thuon sol / So waeren sie beyd gelttes wert Dyser mit faedern / der mit schwert Moecht man jr beid entberen nitt 15 Wann ob der handt nit wer jr schnytt Vnd durch sie würd das recht versert Man vß dem staegenreyff sich nert / Die wile aber vff eygen gewynn Eyn yeder stelt sin muot vnd synn 20 So wellen sie verzyhen mir Das ichs jm narren schiff ouch für Ich hab sie des gebetten nitt Ir yeder selb den fuorlon gytt Vnd wil sich vff eyn nüws verdingen 25 Sunst kunden vil / jns schiff zuo bringen / Schriber vnd glichsßner sint noch vil Die triben yetz wild rüterspil Vnd neren sich kurtz vor der handt / Glich wie die reißknecht vff dem landt / 30 Es ist worlich eyn grosse schand / Das man die strossen nit wil fryen Das bilger / koufflüt / sicher sygen / Aber ich weiß wol / was es duot Man spricht / es mach das geleyt vast guot