Alle die in hohem mv̊te wellē ſin
[241v]
Alle die in hohem mv̊te wellē ſin·
den wil ich dc râtē vf die trúwe min·
dc ſi minnē gvͤtú wib·
ſvnder valſch mit trúwen als ir ſelber lib·
Gvͤtú wib ſint gv̊t fúr allerhande leit·
vō ir gvͤte hat man mange w̾dekeit·
in der w̾lte niemā mag·
an ir helfe vꝛo beliben einen tag·
Zvht vn̄ ere trúwe milde hoh̾ mv̊t·
kvmt vō wibē darzv̊ maniger hāde gv̊t·
ir lip engel ſchone hat·
al der w̾lde heil an ir genadē ſtat·
Ich wil iemer hohē mv̊t vō wibē han·
fwie ein wib vn wiblich habe an mir getan·
ſwc ich da vō leides dol·
deſ mag mich ein gůt wib noch ergetzen wol·
Vinde ich die dú dienſt kan fúr dienſt nemē·
ich tv̊n ir dē dienſt d̾ ir mv̊s gezemē·
vn̄ der mich gemachet w̾t·
ſelheſ wibeſ han ich ie zefrowē gert·
Si mv̊s tvgēde gvͤte bi der ſchoͤne han·
der min lip mir dienſt mer wirt vnd̾tan·
dar zv̊ wiblich ſin gemv̊t·
eren rich voꝛ allem wandel gar behv̊t·
Ich wil gerne ſin ein frǒwē vꝛîer man·
al die wîl ich niht ein gv̊te vindē kan·
e dc ich den dienſt min·
me v̾lur ich wolde e ane frǒwen ſin·