Ane ſwere
[108r]
Ane ſwere·
ein froͤwe ich were·
ân das eine das ſich ſent·
min gemvͤte·
nach ſiner gvͤte·
der er mich wol hat gewent·
ſol ich liden·
von im langes miden·
das mvͤt mich wol ſere·
ich ſpꝛiche im nit mere·
wan das er mich ſiht das ſint ſin ere·
Min geſelle·
ſwas er welle·
das mv̊s im an mir geſchehē·
man ſo gv̊ten·
bas gemv̊ten·
han ich ſeltē me geſehen·
im gelichen·
doch ſo gemellichen·
bi dem fúr die ſwere·
beſſer froͤide were·
iemer hoꝛt ich gerne ſinv́ mere·
Min gedinge·
der iſt geringe·
die wile ich in lebendig han·
ſwer in eret·
vn̄ im meret·
froͤide das iſt mir getan·
ſwas er wolte·
das ich laſſen ſolte·
das konde ich vermiden·
boͤſer lúte miden·
wil ich im ze dienſte liden·
Wol den liben·
der den wiben·
ſelche froͤide machen kan·
mime heile·
ich gar verteile·
midet mich d̾ beſte man·
ſwes er phlege·
ſwenne er bi mir were·
mit ſo froͤmden ſachen·
kvnd er wol gemachen·
das ich ſiner ſchimphe mvͤſe lachen·
Ich wer ſtete·
ſwas er tete·
ob er doch gedehte min·
er ſchiet hinnen·
mit den mīnen·
das ich nit vergiſſe ſin·
wip mit guͤten·
ſol ir ere[WS 1] hvͤten·
ſchône zallen ziten·
wider ir frv́nt nit ſtriten·
alſo wil [108v] ich ſin mit eren biten·
Zv̊ dem ſcheiden·
das vns[WS 2] beiden·
menige froͤide hat erwert·
gottes gv̊te·
mir in behvͤte·
ſwar er in der welte vert·
alſo ſchône
man nach wibes lône·
noch gerang nie mere·
das ich ſiner ere·
was ſo vil das iſt min herze ſere·