Bi liebe lag (Mit aufgelösten Abbreviaturen)

Bi liebe lag·
ein ritter tǒgenliche·
die naht bis an den tag·
der minne enpflag
mit im dú minnekliche·
die minne er widerwag·
bis dc der wahter sang es tagt·
dc von in beiden wart geklagt·
ach herzeliebú frowen min·
so sprach der riter wol gemv̊t
ich wenne es mvͤsse ein scheiden sin·

Es wart niht lang·
dc da mit nahem smvke·
ergie ein vmbevang·
mit armen blank·
vn herzeklichemdruke
der lieb gen liebe twanc·
dú frowe sprach min sender lip·
vnd ich vil súfteberndes wib·
bin iemer me an froͤiden vri·
sol ich dir herre niemer me
geligen alse nahe bi·

Owe vnd ach·
der iambern scheiden·
ir beider herze brach·
dc geschach·
von den gelieben beiden·
dc schv̊f im vngemach·
der ritter sprach· gehabe dich wol·
din lip ist maniger tvgende vol·
min herze dir belibet hie·
si sprach so fuͤre min herze hin·
der wehsel da mit kus ergie·