Der meie iſt komē gar wūneklich (Der wilde Alexander)

Der meie iſt komē gar wūneklich·
mit māgen blv̊mē wol gevar·
d̾ walt iſt nv́wes lǒbes rich·
des machet in d̾ wint̾ bar·
dú vogellin hoͤhent iren ſang·
in dē ǒwē vber al·
da vō ſo wirt ir truren krank·
deſ doͤnet wol dú nahtegal·
ir ſvͤſen ſchal·

Ich wil d̾ liebē dienē g̾n^{[WS 1]}·
deſ ſol ſi mir getruwē wol·
ir hvldē mag ich niht enbern^{[WS 2]}·
ir lib iſt reiner tvgendē vol·
ir mīne mich enzv́ndet hat·
dc ich erkalte zemāger ſtvnt·
dar nach erglvͤge ich an d̾ ſtat·
als ob ich bꝛinne dc tůt mir kvnt·
ir rot̾ mv̄t·

Wol mich dc ich ſi ſehē ſol·
ſiſt mineſ h̾zen oſt̾tag·
got hat ir lib gebildet wol·
ſi liliē ſchin vn̄ balſē ſmag·
meiē zit vn̄ heide glanz·
iſt ſie mī ſpilnd̾ ſvnnē bꝛehen·
ſi treit d̾ erē roſē kranz
deſ mv̊s ir al dú mēge iehē·
die ſi hant geſehen·

Si iſt vil hoher erē rich·
ir lob dc vert gar ane meil·
ir blvͤndú ivgēt iſt wūneklich·
an ir lit miner ſelden teil·
ir mv́ndel bꝛēnet als ein glůt·
ir wengel die ſīt roſevar·
voꝛ miſſewende iſt ſi behv̊t·
ir lib iſt alles valſches bar·
vn̄ da bi clar·

Wol mich ir ſchoͤne vn̄ ǒch ir zuht·
wol mich ir ſpilndes^{[WS 3]} ǒgē bꝛehē·
wol mich der reinē ſvͤzen fruht·
wol mich dc ich ſi an ſol ſehen·
wol mich d̾ reinē ſvͤzē clar·
wol mich ir tvgende manigvalt·
wol mih ir wengel wol gevar·
Ir tvgende blvͤiet al ſam ein walt·
gar wol geſtalt·

Anmerkungen (Wikisource)

1. Vorlage: g̾ne.
2. Vorlage:embern.
3. Vorlage: ſpilndē.