Der meie kvmt mit schalle

Der meie kvmt mit schalle·
die vogel singent alle·
von manger varwe rich·
ist dú heide wunneklich·
sich mag niht gelichen·
den svͤssen minnelichen
reinen frowen gv̊t·
die vor valsche sint behv̊t·
ein kvs von rotem mvnde·
der froͤiwet von herzen grvnde·
dar zv̊ ein vmbevang·
von zwein schonen armen blank·

Swer zvht vnd ere minne·
der habe in sime sinne·
dc er frowen sol·
zallen ziten sprechen wol·
er sol si lieblich gruͤssen·
mit senften sprechen svͤssen·
so beginnet sin pflegen·
manig wunneklicher segen·
von rotem mvnde ein lachen·
mag alles truren swachen·
ir spilnder ǒgen funt·
machet ein herze lieplich wunt·

Wichent dem liehten schine·
mv́nde rot als die rubine·
wengel wol gevar·
minneklichen vnd da bi clar·
tragent svͤsse frǒwen·
man sol si gerne schǒwen·
fúr alles das nv lebet·
ir lob in hohen werden swebet·
mit hvndert tvsent mv́nden·
kan niemā vollegruͤnden·
frowen werdekeit·
ir lob vnd ere breit·