Der meije iſt aber hie mit núwer blvͤte

Der meije iſt aber hie mit núwer blvͤte·
des bin ich vro want er git hochgemvͤte·
man hoͤꝛt aber die vogellin kallen· gen der wunnebernder zit·
berg vn̄ tal mit blůmen ſint gezieret·
der walt grůnet dv́ heid in blvͤt ſmieret
mit manger hant varwe die v́ns aber der ſvͤſſe meije git·
ivng vn̄ alt des ſint gemeit ſid das heid vn anger
ſwāger mit den blv̊men ſint·
ſvs zieret d̾ meije ſinv kint·

Wa lieplich liep bi herzē liebv́ lvſſet·
dv́ minn alſam ein vederſpil ſich mvſſet·
ſi rêret leit vn̄ kleidet an ſich lieplich gevider in werents liep
welch herz in ſolichv́ liebi wirt gebvnden·
daſ hat mir liebi leit gar v́ber wunden·
liep vn̄ leit mv̊s beidv́ liden ein ieklich mīnē diep·
an den armen lieplich liep· ſi liep in den ǒgen·
tǒgen ſol man mīne enpflegen·
mit glicher wage liep wider wegen·

Ach minne daſ dv biſt ſo gar gewaltig·
das din ſtrike ſint ſo manigvaltig·
dv toͤꝛeſt mangen wiſen man· doch ſint dir holt beidv́ ivng vn̄ alt·
minne wer mag din wunder vollen ſchriben·
das dv begeſt an mannen vn̄ an wiben·
dem dv frv́ntſchaft erzeigen wilt· den dvnket er hab wúnſches gewalt·
ſvͤſſv́ minne mīneklichv́· din nam iſt gehv́re·
túre biſt dv das iſt war·
doch iſt din mv̊t wild̾ dann ein âr·