Der meije ist aber hie mit núwer blvͤte

Der meije ist aber hie mit núwer blvͤte·
des bin ich vro want er git hochgemvͤte·
man hoͤrt aber die vogellin kallen· gen der wunnebernder zit·
berg vnd tal mit blůmen sint gezieret·
der walt grůnet dv́ heid in blvͤt smieret
mit manger hant varwe die v́ns aber der svͤsse meije git·
ivng vnd alt des sint gemeit sid das heid vn anger
swanger mit den blv̊men sint·
svs zieret der meije sinv kint·

Wa lieplich liep bi herzen liebv́ lvsset·
dv́ minn alsam ein vederspil sich mvsset·
si rêret leit vnd kleidet an sich lieplich gevider in werents liep
welch herz in solichv́ liebi wirt gebvnden·
das hat mir liebi leit gar v́ber wunden·
liep vnd leit mv̊s beidv́ liden ein ieklich minnen diep·
an den armen lieplich liep· si liep in den ǒgen·
tǒgen sol man minne enpflegen·
mit glicher wage liep wider wegen·

Ach minne das dv bist so gar gewaltig·
das din strike sint so manigvaltig·
dv toͤrest mangen wisen man· doch sint dir holt beidv́ ivng vnd alt·
minne wer mag din wunder vollen schriben·
das dv begest an mannen vnd an wiben·
dem dv frv́ntschaft erzeigen wilt· den dvnket er hab wúnsches gewalt·
svͤssv́ minne minneklichv́· din nam ist gehv́re·
túre bist dv das ist war·
doch ist din mv̊t wilder dann ein âr·