Der siben kv́nst hoch gelobt wirdi treit

Der siben kv́nst hoch gelobt wirdi treit·
gramatica· dv́ sich an tugenden nie versneit·
ir lere gůte zúchte git mit selikeit·
wer fv̊ge lernen wil der mv̊s der siben kv́nst beginnen·
da bi so leret loyca vil rechten sin·
Jeomatria das ist ein gůte messerin·
mit húbscher ... hat si lobelichen sin·
da bi ...a· ein kvnst von hohen sinnen·
Astronomia^{[WS 1]} dv́ vil svͤsse leret·
reine^{[WS 2]} milt wesen vmbescheidenheit·
vil selig man· la dir din kvnst nit wesen leit·
si bringet zucht trúwe· da bi bescheidenheit·
wol im der sinen sin vil gar an siben kv́nste kêret·

Rethorica der hohen selden spiegel treit·
frv́ntliche gunst dvr lúcht den sin ane herzeleit·
rilichen mv̊t der sich an tugenden nie versneit·
hat si vil meisterlichen gar· in herzen nv verslossen·
wer iren grvnt weis vnd fundamente riche·
der mv̊s ane ende leben iemer tugentlich·
me frijes mv̊tes denn der nicht weis ir gelich·
ein ewigs leben wunnesam· gar reine vnd vnverdrossen·
wel man der kv́nste sol mit zv́chten walten·
der mag bescheidenheit in herzen sinne pflegen·
boͤser gedenke sol er sih von grunt bewegen·
wil er vol enden· steten waren gottes segen·
er selig man so mag er doͤrt mit froͤiden iemer alten·

Mvsica wort vnd wise versigelt hat·
wer si beslossen treit· mit hoher eren rat·
mit richen doͤnen er in manigen tugenden stat·
wer si wol kan wie solti dem an selden misselingen
froͤilichen sang kan music ǒch geleren wol
von manger kel vil gar vf hoher eren zol·
behendeklich recht als man billich doͤnen sol·
si leret hoher seiten klank· vnd ǒch nach tugenden ringen·
dis ist der siben kv́nste rechte lere
wer si hat· der ist iemer aller sorgen vri·
im wonet zucht milt vnd rechte masse bi·
er selig man in dem dis gar beslossen si·
der darf zv̊ dirre welte hoher selden geren nicht mêre·

Anmerkungen (Wikisource)

1. Vorlage: Aſtronia.
2. Vorlage: rei.