Der vogel svͤzes schallen
[173r]
Der vogel svͤzes schallen·
hat mich húgende braht·
dc min varndes leit ein teil geringet ist·
dc mv̊s mir wol gevallen·
dc sis habent gedaht·
so wol dir lieber svmer dc dv komen bist·
het ich da bi eines wibes hvlde·
owe wc wolt ich danne me·
dc wer alles mines liebes vbergulde·
ich en han niht volleklicher froͤiden ê·
[173v] Ich bin noch iender selten·
von ir froͤiden vro·
wan so vro dc ich ir vil gesvngen han·
des ê sol si niht engelten·
ich tůn also·
ich diene ir iemer vf den minneklichen wan·
dc dú froͤide núwe froͤide bringe·
mir so ist mir wol geschehen·
vnd mir ander wolgetanen wol gelinge·
so mv̊s ich gelúkes minem lebenne iehen·
Ich han noh den gedingen·
dc si troͤste mich·
also dc miner senden sorgen wirdet rat·
dc si von minem singen·
noh bedenke sich·
dc[WS 1] ir alse núwez[WS 2] in ir oren gat·
von ir svͤzem minneklichem libe·
hoͤret minneklicher sang·
gerne svnge ich wol gemv̊ten wiben·
ie doh mvͤt mich langer dienest ane danc·
Das man der wibe schoͤne·
mit ganzer wirde lobe·
dc minne ich da bi ir tvgende verre bc·
ir tugent ich iemer kroͤne·
allen schoͤnen obe·
dc belibet von den gv̊ten ane has·
vrowe ir sit schoͤne vnd minnekliche·
swie dú tvgende hoher ste·
dc lat ane has ir sit doh beider riche·
ir habt schoͤne vil vnd da bi tugende me·