Die Schedelsche Weltchronik (deutsch):256

255 <<<Vorheriges Blatt	Die Schedelsche Weltchronik    Blatt CCLVI	Nächstes Blatt>>> 257
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

255 verso:

Das sechst alter

Galeacius maria hertzog zu Mayland

GAleacius maria hertzog zu Mayland^[1] wardt im iar Cristi .M.cccc.lxxvii.^[2] von dem edeln maylender Johanne andrea lamprogniano an sant Stephans des ersten martrers tag in desselben sant Stephans kirchen bey dem hohaltar vngewarnt erstochen. der dann nach Francisco sforciam erwelter hertzog .ix. iar vnd .x. monat regiret. ein schnelsynnig man vnd großmu^eetiger fu^erst. der vil gepewe in der statt zu Mayland auffgericht vnd die stat mit gehawen staynen zepflastern geschaft vnd sein veterliche außgescho^epfte schatzkamer sere mit reichthu^emern gefu^ellet. vnd sundere begirde vnd fleiß der besten synnger zu go^etlichem dienst gehabt vnd große kostung darauff gelegt hat. aber nach dem er sich vnmessiger begirigkeit der weiber geprauchet. vnd des adels vnd der wirdigkeit seiner maiestat vnd fu^erstlichen ho^ehe nit verschonet darumb wardt er auß beschehner zusammen schwerung in angesihte alles volcks vnd alles seins hofgesinds in dem .xxxiii. iar seins alters erstochen vnd starb schentlich vnd wardt bey seinen eltern begraben. vnd ließ bey Bona seiner gemahel einer hertzogin von Sophoy^[3] zwen su^en vnd ein tochter. Johannes maria sein sun wrd in dem .ix. iar seins alters an der heilligen dreyer ko^enig tag^[4] zu hertzogen gesetzt.

Carolus hertzog zu Burgundi

CArolus hertzog zu burgundi^[5] hertzogs Philipsen des gu^oten sun der letst auß dem durchleu^echtigen vnd ko^enigclichen franckreichischen geschlecht geporn was ein starck ernsthaftig. großmu^eetig vnd erschro^eckenlich man. aber gerecht. mylt. zu der gabe des almu^osens vnd go^etlicher ambt vnd dienst hohgeflißen. Als er das .xx. iar seins alters erraichet vnd die von Jhent von seinem vater ein freyheit außbracht hetten do sammlet er ein groß heer wider sie vnd erobret die statt vnd hieß die freyheiten am marck[t] verprennen. Darnach hat er mit ko^enig Ludwigen zu franckreich vil widerspennigkeit gehabt. vnd nach hinlegung derselben die von Lu^ettich mit heereßkraft vberzogen dieselben statt erobert vnd nach vil geu^ebten todschlegen vnd berawbung geschlayft. vnd nachfolgend von wegen Eduardi des ko^enigs zu Engelland seins schwestermans (der von graff Douerich vnd ko^enig Heinrichen von Portugalia auß Brittannia vertriben ward) ein gross heer gesammelt vnd wider dieselben vnd auch ko^enig Ludwigen einen krieg angefangen. vnd denselben Eduardum in ku^ertze haym geschickt vnd sich wider ko^enig Ludwigen zu krieg gerichtet vnd ime vil schadens vnd vnfu^ogs getan. aber nach befridung diser sachen zohe er mit großer mechtiger heereßkraft fu^er die statt Newß^[6] am Rhein gelegen. Als aber kaiser Friderich derselben statt zu rettunng kome do zohe Carolus wider anhayms. als er ime nw vil lannd vnnd stett mit großer schlacht vndertenig gemacht het do zohe er fu^er die statt Nansee^[7] in Lothringen gelegen des willens die Schweitzer zebekriegen. aber die Schweitzer fieln ime in sein heer vnd griffen ine also ernstlich an das er flu^echtig vnnd in der flucht erschlagen vnd verlorn ward. vnd ließ ein einige tochter die erbet den vater. vnnd wardt darnach Maximiliano kaiser Friderichs sun yetzo ro^emischen ko^enig vermehelt. Disem hertzog Carln sind drey stett geferlich vnd schedlich gewesen. nemlich Gransee an den gu^eetern. Murtha am volck vnnd Nansee am leib.

FErdinandus ko^enig zu Neapolis^[8] vnderstund sich den fridlichen stand welscher land in dem .M.cccc.lxxviii. iar^[9] zebetru^eben. vnd schicket graff Jheronimum babsts Sixten o^eheim vnnd Raphaelem den cardinal des selben grafen schwester sun. vnnd Franciscum Siluiatum den Pisanischen ertzbischoff mit dreyhundert mannen gein Florentz die machten mit irer anhangenden parthey ein auffru^or. darinn wardt Julianus de medicis erstochen. vnd Laurencius de medicis sere verwundet. vnd doch zu letst mit klu^ogheit die auffru^or ein wenig gestillet. Darnach warden vil vrsacher so^elcher auffru^or erschlagen vnd vil mitsambt dem pisanischen bischoff erhenckt. vnd der cardinal Raphael bis zu stillung vnd hinlegung der ding von den Florentinern enthalten.

HEwschrecken haben desselben iars durch welsch land fliegende die lantschaft vmb Brixen verwu^eestet vnd wo marggraf Ludwig zu Mantua nicht fu^erkomen het so hetten sie die saet in gantz Lombardia abgefretzt.

EIn großer grawsamer sterben der pestilenntz hat diss iars durch alles Welsch land gewebert also das zu Brixen ob .xx^m.^[10] vnnd zu Venedig ob xxx^m.^[11] menschen vergiengen. auß vrsachen so^elcher hewschrecken vnd finsternus der sunnen die desselben iars in dem monat Julio gewesen was.

DIe Venediger warden mit schwerem krieg des ethrurischen lands vnd in Macedonia vnd Foriaul durch großen vberzu^og Othomanni beladen. vnd als sie aber den babst in langer zeit nicht erwaichen mochten vnnd bey. xxvii. iaren mit großen teglichen vnd langen kriegen in kriechen land Macedonia vnd Foriaul von den Tu^ercken beku^emmert warden do machten sie mit dem Mahmetischen kaiser ein pu^entnus vnd gaben ime wider alles das das vormals sein vnd der seinen gewesen was mit verpflichtung ime zway iar hundert tawsent guldein zegeben.

256 recto:

der werlt

Blat CCLVI

WIewol die rhodiser^[12] nicht kleine beschwerde von den Tu^ercken gehabt haben so haben sie doch nach bestreyttunng vnnd nyderlag der statt Constantinopel vil schwerer krieg empfunnden. dann als die Tu^ercken in xxiiii. iaren ettwieuil ine nahendgelegne stett vnd land vnderworffen hetten do empfieng der Machomet^[13] verdrieß in ho^ehmu^et das die statt Rhodis also nahend gelegen noch frey vnd ime nicht vndertenig solt sein. dem nach schiffet der Machometisch kaiser mit großer mechtiger heereßkraft fu^er Rhodis vnd stellet sein heergeleger am .xxiii. tag des monats may des iars Cristi .M.cccc.lxxx.^[14] auff sant Stephans berg vnd darumb. vnd beschusse die stat drey monat aneinander on vnderlaß. Aber Petrus dabuson^[15] der hohmaister zu Rhodis ein klu^og vnd starckmu^eetig man erzaiget die kraft seiner festmu^eetigkeit mit der tat manlichs vnnd vnerschrockens widerstands. dardurch auß go^ettlicher mithilff die Tu^ercken von den cristenlichen rittern zertrennt. abgetriben. geschlagen vnd mit solcher vngestu^ome in die flucht gebracht warden das sie sichselbs in dem gedrenge erto^edten. Man sagt das die tu^ercken ein gesyhte eins wunderzaichens gesehen vnd darob ein solchen großen schrecken empfangen hetten dz sie flu^echtig worden werden. darumb ist gu^eetigclich zeueriehen das solcher syge vnd vberwindung von hymel den cristenlichen rittern gegeben worden sey. die dann in so klainer zal den mechtigen feind der bis auff die mawr komen was widerstand gethan haben. Vnd der machometisch kaiser zohe am .lxxxix. tag nach anfang seiner belegerung der statt Rhodis mit seiner schiffung vnerlich vnnd schentlich von dannen. Aber Petrus der hohmaister het von babst Sixto vnd andern cristglawbigen menschen in Europa mit gelt hilff vnd beystand damit er die verheerten vnd verwu^eesten inseln wider besseret.

Bruder Niclas

DIser zeit enthielt sich bey den Schweytzern nciht verrne von Lucern in einer vngehewren ayno^ede ein alt man gar in gelaßnem vnd abgezognem leben bey .xx. iarn an alle leipliche speys. den nennten sie bru^oder Niclaßen.^[16] der wz du^errs magers außgescho^epfts leibs. allain von hawt. geeder vnd gepeyn zusamen geschmuckt. Vnnd wiewol die aynsydler von wegen irs mu^essigen wesens am schatten. vnd darumb auch das von irer vnuerdewung wegen vil feu^echter kalter vnd roher vberflu^essigkeit in inen gesammelt werden destlenger fasten mu^ogen. yedoch so hat diser mensch in gantzem abzug so langerzeit als ein himlisch leben auf erden on vnbefleckte vermayligung gefu^eert. vnd wiewol ettlich menschen disen bruder Niclasen einen ru^omgirigen man zesein beschuldigt vnd sein leben zu ru^omretigkeit außgelegt vnnd gesagt haben das er damit seinen lon hab empfangen. so sind doch dieselben menschen vngerecht richter. dann warumb reden sie dem menschen vbel nach der so ein langs leben in so großer armu^ot vnd ayno^ede gefu^eert der so vil iar in gu^otem wandel sein haymsucher tro^estende verzert. vnd in der allereu^eßersten vnd gestrengsten gelassenheit vnd demu^ot verharret. der nichtz begert vnnd nymants beschwert hat. Het er nw vmb solche große arbait menschlichs lobs begeret so het ein große mu^ee einen kleinen lon. der ist ein thoret mensch der vmb menschlichs ru^oms willen seinen leib peynigt. Aber diser ist ein heilliger vnd gerechter man. der die geitzigkeit vndergetru^eckt. die ere der werlt verschmaht. geduldt gehalten. vnd keinen funcken der hohfart erzaigt. sunder sein hoffnung zu ku^enftiger seligkeit gesetzt vnd der widergeltung vnd belonung seins gestrengen lebens bey den vnzergengklichen reichthu^emern der himlischen schetze gewartet. Die stet freu^ed seins hertzens zaigt an die vnzweyfellichen gewißheit seiner vnuerwenckten hoffnung. dann er ward nye trawrig sunder alweg fro^elicher gestalt gesehen. Er weßte sich to^edlicher schuld ledig vnd zu gu^oten wercken vnd beschewlichkeiten geflißen. also das er mit sant paulßen sprechen mocht. Vnßer glori vnd ru^om ist die gezeu^egknus vnßers gewißens. Mir ist berayt die kron der gerechtigkeit die wird mir geben der gerecht richter zu meiner zeit. Diser Niclas wardt auch durch den bischof zu Costnitz bewert. Zu letst starb er vor alter vnd ein waycher schlaff entlo^eset sein alte sele. vnd der leichnam ward in seins pfarrers kirchen bestattet. daselbst rastet er nit an wunderzaichen. Er hat auch dem volck daselbst vmb ettliche ku^enftige ding fu^ergeku^endet vnd einen grossen wone der heilligkeit hinder ime gelaßen.

Hydruntum ein grosse meerstatt in apulia^[17] wardt in disem .M.cccc.lxxx. iar^[18] von dem Tu^erckischen heer belegert beschoßen vnd zu letst erobert. der ertzbischof daselbst erschlagen. alles volck enthawbtet. Franciscus lurgus der hertzog daselbst gefangen vnd mytten von einander gesegt. ob .xii^m.^[19] menschen geto^edt. vnd komen nicht mer dann .xxii. daruon. darumb wer es vbel vmb Apulia gestannden wo der Tu^erckisch kayser lennger gelebt het. Aber als derselb kayser starb do belegeret Alphonsus der hertzog zu Calabria die statt. Als aber die Tu^ercken ho^erten das ir kaiser gestorben wer do ergaben sie sich an den hertzogen vnd erlangten sicherung von ime.

Anmerkungen (Wikisource)

1. Galeazzo Maria Sforza (* 24. Januar 1444; † 26. Dezember 1476) war Herzog von Mailand.
2. 1477 n. Chr.
3. Sophoy ist Savoyen
4. 6. Januar
5. Karl I. «der Kühne» (* 10. November 1433 in Dijon; † 5. Januar 1477 bei Nancy) war Herzog von Burgund und Luxemburg aus der burgundischen Seitenlinie des französischen Königshauses der Valois.
6. Neuss
7. Nancy
8. Ferdinand „der Katholische“ (1452–1516) war als Ferdinand II. König von Sizilien und Sardinien und als Ferdinand V. König von Kastilien und León.
9. 1478 n. Chr.
10. 20.000
11. 30.000
12. Die erste Belagerung von Rhodos, der Hauptstadt und wichtigsten Festung des Johanniterordens, begann am 23. Mai 1480 und endete – nach einem letzten erfolglosen Sturmversuch am 28. Juli – im August 1480 mit der Wiedereinschiffung der türkischen Belagerungsarmee.
13. Mehmet II. war 1451–1481 Sultan des Osmanischen Reichs.
14. 23. Mai 1480
15. Fra′ Pierre d’Aubusson (genannt Schild der Kirche), auch Petrus Albussanus, (1423–1503) war von 1476 bis zu seinem Tod der 40. Großmeister des Johanniterordens.
16. Niklaus von Flüe oder Bruder Klaus (1417–1487) war ein Schweizer Einsiedler, Asket und Mystiker. Er gilt als Schutzpatron der Schweiz.
17. Otranto, siehe Wikipedia: Otranto-Feldzug
18. 1480 n. Chr.
19. über 12.000