Die Schedelsche Weltchronik (deutsch):263

262 <<<Vorheriges Blatt	Die Schedelsche Weltchronik Blatt CCLXIII	Nächstes Blatt>>> 264

unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CCLXII verso:

Das letst alter

aber dise ding fleissiger wissen wolt der mag die auß dem prunnen scho^epffen vnnd mer dann wir in disem bu^och begreiffen mu^egen wunderperlicher ding suchen. vnd wenn nw solche zerstrewung auff dem ertreich beschiht. vnd der almechtig komen wirdt in dem stu^ol vnd thron seiner maiestat alle selen vnd die gantzen werlt zerichten so wirdt in derselben zeit ein offenbare gemayne vrstend aller menschen. alßdenn wirdt der leichnam der do auff ersteet von den todten vnzersto^erlich vnd vnto^edlich. nicht allain der gerechten sunder auch der su^ender. doch der gerechten das sie alweg bey Cristo bleyben mu^egen. aber der su^ender das sie on ir vergencknus verschu^oldte straff vnd peyn leyden. zu letst wirdt der gerecht richter die gerechten mit ewigkeit der glori begaben. vnnd den vngu^eetigen lange schmah vnd peyn auflegen. derselben leichname werden in ewigkeit bleiben zu geduldung ewiger creu^etzigung. marter vnd peyn des fewrs. das vil anders genaturt ist dann das vnßer. das doch wo es mit einicher materi nicht enthalten wu^erdt erlischet. aber ihens ewig fewr lebt vnd schwebt durch sich selbs alweg on einiche materliche ernerung vnd gibt ime selbs ewige fu^orung vnd enthaltung vnd bringt peylichkeit des schmertzens. Was vnaußsprechenlicher freu^ed vnd frolockung werden aber die gerechten vnd gu^eetigen haben so sie nach empfliehung des ewigen iamers. ellends vnd quals zu disem gerechsten richter vnd allergu^eetigsten vater tretten vnd ru^oe fu^er arbait. das leben fu^er den tod. die klarheit fu^er die finsternus. die ewigen vnd himlischen gu^eetere fu^er die irdischen vnd ku^ortzen empfahen werden. darumb sollen alle menschen fleiß an keren sich auff das schierst zu dem rechten weg zeschicken oder in angenomner vbung der tugent vnd in volbringung des arbaitsamen lebens gedultigclich zebeharren vnd also go^etliches trosts vnd lons zeerwarten. dann vnßer vater vnd herr (der den himel gezymmert vnd befestigt. die sunnen mit anderm gestirne erleu^echtet. das ertreich mit bergen vmbfangen. mit dem meer vmbgeben. vnd mit wasserflu^eßen vnderschaiden. vnd alle ding in diser werlt auß nichtem beschaffen hat) der hat auch in betrachtung der irrung der menschen vns einen fu^eerer layter vnd anweiser auff den weg der gerechtigkeit gesendet. dem wo^ellen wir alle nachfolgen. den wo^ellen wir ho^eren. dem wo^ellen wir fleißigclich vnd andechtigclich gehorsam sein vnd wo^ellen mit dem alten feind des menschlichen hayls (denn wir kennen) manlichlich vnd ku^enlich in den kampff tretten vnd nach vberwindung desselben vnßers widersachers triumphirende vnd obsigende der versprochen belonung der tugent von got vnzweifellich gewarten vnd durch die grossen pforten vber den gestirnten^[1] himel auff in den ho^ehsten himel eingeen. Alda dann die statt der selligen burgere vnd gottes vnßer mu^oter Jherusalem in den mytteln feldern des hymels erscheinen wirdt. Dise statt gottes hat ein liecht gleich eim costenlichen stayn. Ir mawr ist gross vnd hoh mit. xij. pforten. vnd geschriben namen der. xij. geschlecht der kinder israhel. vier seyten. als do sinnd die vier tayl der werlt. die mawr der statt die do vieregket ist hat. xij. grundfest vnd darinn die. xij. namen der. xij. appostel. vnd die grundfest der mawr der statt sinnd mit allen ko^estlichen stayn geziert. darumb wenn wir in diss war vaterland wider eingeen so werden wir mit vnaußsprechlicher freu^ed iubel vnd frolockung durchgossen. in welchem vaterland wir entsprungen vnd darauß pu^ertig sind. O wie werden wir frolocken so wir nach disem langem iamerigem vnd geferlichem ellend vnßer freu^edenreichs vaterland ewiger seligkeit glori vnd ere anplicken vnd sehen werden. darumb sollen wir bitten das der herr vns vnd allen den die diss ho^eren verleyhe mit bewartem von vns empfangnem glawben nach verscheynung der zeit der hinderlegten vnd berayten kron der gerechtigkeit zeerharren. vnd vnder den ihenen die in das ewig leben auff ersteen gefunden vnd von ewiger schand vnnd peyn geledigt zewerden durch Jhesum cristum vnßern herrñ. durch den sey got vater dem almechtigen mit dem heilligen gaist ewigs lob. ere. benedeyung. preys. klarheit. weißheit. gewalt. hayl. kraft. tugent vnd glori zu ewiger danckperkeit gesagt in die ewigkeit der ewigkeit Amen.

Auß go^etlichem beystand endet sich alhie das bu^och von den geschihten der alter der werlt vnd von beschreibung der beru^embtisten vnd namhaftigisten stett sagende durch Georgium alt deßmals losungschreiber der kaiserlichen reichßstatt Nu^ermberg auß latein in teu^etsch gebracht vnd beschloßen nach der gepurt Cristi Jhesu vnßers haylands. M. cccc. xciij. iar am fu^enften tag des monats Octobris.

Altithrono sint perpetue landes. ag. alt.

CCLXIII recto:

Blat CCLXIII

WIewol allererst nach beschluss des bu^ochs vns die nachfolgenden beschreybungen des Polnischen lannds Auch der stett Kraka Lu^ebeck vnd Neyss zu komen sind yedoch haben wir dieselben als neben andern gu^oter gedechtnus wol wirdig im ende diss bu^ochs nit vnbegriffen laßen wo^ellen.

Von der gegent Europe Sarmacia oder Polen genant

Vonm ko^enigreich Poln vnd seinem vrsprung

NAch dem von Boleslao (der der dritt Sarmatisch oder Polnisch ko^enig gewest ist) pald hernach meldung beschehen wirdt so hab ich mir fu^ergesetzt von dem land Sarmacia oder Poln. vnd in was gestalt es das ko^enigcklich scepter erlangt hab ku^ertzlich anzaigung zethun. Nw ist Sarmacia ein fast weyte vnd große aber doch vnerpawte vnd in ayno^ede gelegne gegent vnder eim gar herten luft. vnd hat vonm orient die Mosthos vnd den fluss Thanaym von mittemtag. Dacos vnd die Hungern vonm nydergang. Die Beheim Merhern Schlesier vnd Teu^etschen von mitternacht. Das teu^etsch meer mare germanicum genant. aber das das allain den namen des ko^enigreichs taylt das nennen sie Poln. vnd hat zwen namen. dann der tayl des lands da Crackaw gelegen ist wirdt das kleiner Poln. vnnd bey Boßna das großer genannt. Nw regirten von Craco dem ersten hertzogen bis zu den zeiten Boleslai des ersten allain hertzogen daselbst. Aber in zeiten kaisers Otten des ersten was Boleslaus der hohberu^embst hertzog. doch nit der von dem wir in sant Stanislaus leben sagen werden. dann derselb was

↑ [WS: korrigiert, im Druck „gestinrten“]

[1] [WS: korrigiert, im Druck „gestinrten“]

[1]