Die Schedelsche Weltchronik (deutsch):264

263 <<<Vorheriges Blatt	Die Schedelsche Weltchronik    Blatt CCLXIIII	Nächstes Blatt>>> 265
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

CCLXIII verso:

sein enicklein. der auß eim mu^ench diss Boleslai sun geporn wardt. Diser Boleslaus verfolget den Franckreichischen ko^enig vnd die teu^etschen vo^elcker mit obsyglicher hand. Zu letst kome er von kaisers Otten gebette wegen nach hinlegung solchs kriegs mit den teu^etschen vnd Franckreichischen in pu^entnus. Als aber kaiser Otto diss fu^ersten großmu^eetigkeit bey gantzem teu^etschen vnd Sarmatischem land bekannt sahe do zohe er mit hertzog Boleslao in Sarmaciam sein herrschung gewalt vnd mechtigkeit clerlicher zebesichtigen. Den empfieng der durchleu^echtig hertzog mit ho^ehsten eren in die statt Boßna. dann er hieß vnd schaffet .iii^m. schrit. oder verrer fu^er die statt seydine wollen vnd ko^estliche klaider mit gold vnd silber geziert dem kaiser an den weg vnder zestrewen. vnd nach eyngang des kaisers in die statt Boßna was eim yeden zymlich dieselben vndergestrewten ding auffzeheben vnnd hinzetragen. Daselbst eret er den kaiser mit großtetigen vnd hohscheinperlichen wirtschaften. Rennen. stechen. spiln vnd andern ku^ertzweiligen vbungen. also ko^estperlich das in den wirtschaften kein anders dann guldeins geschyrr gepraucht wardt. vnd dasselb hieß er nach einer yeden speys in vnergrundlich prunnen werffen vnd verlieren. Als nw yetz der kaiser diss fu^ersten myltigkeit. großmu^eetigkeit vnd der reichthu^emer vberflu^eßigkeit gesehen het do gedacht er nicht vnbillich ein solchen hohberu^embten hertzogen ko^enigclicher kron wirdig zesein. Also ward Boleslaus von dem kaiser mit ko^enigclichem cepter vnd kron geziert vnd mit andern wirdigkeiten eim ko^enigclichen stu^ol gepu^erende begabet. Auff das aber Boleslaus yetzo ein durchleu^echtiger ko^enig solcher gu^ottat gein dem kaiser nicht vndanckper gesehen wu^erd so schencket er den arm sancti Adalberti des bischofs (den die Preu^eßen bo^eßlich erto^edt hetten) dem kaiser fu^er ein gabe. Als nw die mechtigkeit diss ko^enigreichs bis auff .M.cccc. iar vnßers hayls.^[1] oder ein wenig dauor zugenomen het vnd der ko^enig zu Poln on leibs erben abgangen was do wardt der hertzog der vber die Litawer vnd Rewßen herrschet zu ko^enig erwelet. vnnd wiewol derselb hertzog dauor die abgo^etter eret yedoch empfienge er zu der zeit als ime das ko^enigclich cepter vberantwurt ward mit allem seinem land vber das er herrschet den cristenlichen glawben vnnd bracht die Littawer vnnd Rewssen also zu dem polnischen ko^enigreich das sie an sundere geding von ime nicht getrennt werden mo^echten. Diser allerdurchleu^echtigst fu^erst hat die Prewssen mit eim grawsammen ernstlichen krieg ime zu gehorsamm gebracht vnd seinen gewalt erweytert. Daselbst sind nammhaftig steet Tantzka vnnd Thorn. vnd auch das beru^embst schloss Marieburg. der gleichen kein mensch ye gesehen hat mit vil mancherlay gepewen. zynnen. thu^ernen vnd greben befestigt das keinem feind eynich sicherer zugang zu disem schloss nit sein mag. Vor ettwieuil iaren ist diss ko^enigreich an mechtigkeit weyter gewest aber doch auß verfolgung des vngetrewen volcks der Tartern vnnd Tu^ercken dem gantzen polnischen land schand vnd abbruch beschehen. dann das land hinder Rewssen gelegen Podolia genannt ist gantz außgeprennt vnd ligt wu^eest also das es den durchziehenden vnd wandrern nicht notturftigkeit tragen mag. wiewol es also ein fruchtper erdpodem ist das gras eins langen mans hoh darauff wechst vnd also vol pynen vnd ho^enigs ist das sie nicht genu^og statt haben mu^ogen dohin sie das ho^enig tragen. dann vnder den pawmen oder stawden vnd in den welden sameln sie die ho^enigsamen. Gross namhaftig weld sind durch gantz polnisch land auß darinn man bis in die Littaw vnd Scithiam komen mag vnd ist vil wilprets in denselben welden. vnd in dem mitternachtlichen tayl des polnischen hercinischen walds sind vnder andern gewillde frayssame große thier aurochßen genant die sind dem menschen fast feind vnd gar gu^ot zeessen. haben prayte styrn vnd ho^erner vnd sind nicht gu^ot zefahen dann mit großer vnd mancherlay mu^ee vnd arbait. Diss land tregt kein ertzte denn allain pley von grosser kelte wegen desselben ertreichs. aber alda ist vil saltzs das von dannen in weyte gegent gefu^eert. dauon entspringt dem gantzen land grosser nutz vnd narung. vnd dem ko^enig von nichten mer schatzs dann von demselben saltz. dann vnder dem ertreich hawet man gross saltzfelsen. aber außerhalb des ertreichs seu^edet man anders saltz auß wasser. Diss land ist auch an fru^echten vnd allem dem das zu narung menschlichs leichnams dienet gar sere fruchtper. Nw ist zemercken von dem hohberu^embsten leibßgeschlecht des durchleu^echtigsten fu^ersten Vladislai von dem wir hieuor gesagt haben. Derselb hat (als ettlich sagen) drey frawen gehabt vnd auß inen zwen su^en empfangen. Der elter hieß Vladislaus. der ander Cassimirus. Vladislaus hat nach absterben seins vaters den ko^enigclichen gewalt empfangen vnd vber die ko^enigreich Hungern Beheim vnd Poln geherrschet. vnd daselbst mit ritterlicher hand hohberu^embte tate geu^ebet. vnd sein reich vnd den cristenlichen glawben erwaytert. dann er het dem tu^erckischen ko^enig souil lands abgedrungen das er bis fu^er Constantinopel mit heereßkraft rayset. vnd ernstlichen krieg wider die tu^ercken fu^eeret vnnd bede tayl in grawsammem gefechte gegen einander strytten also doch das die hungern flu^echtig warden vnnd den ko^enig mit wenig polnischem volck vnder so großer menig der feind verliessen. Aber Casimirus herrschet als ein hertzog vber die Littawer vnd Rewssen vnd wardt nach absterben des ko^enigs seins bruders von den Sarmatern oder Poln zu ko^enig erkleret. vnnd ime eins hertzogen von o^esterreichs tochter ko^enig Laßlaws schwester zu der ee vermehelt. Auß derselben hat er sechs su^en vnd fu^enff to^echter geporn[.] Der erst Vladislaus genant. der ward noch also iung zu ko^enig von Beheim vnd darnach auff absterben Mathie des hungrischen ko^enig daselbst auch zu ko^enig erkorn von wunderperlicher seiner großmu^eetigkeit vnd gu^oter rete wegen. Der ander sun Casimirus nach dem vater genant starb in einem seu^echen. Der dritt Johannesalbertus yetzo ein ku^enftiger wunderspiegel der gantzen werlt. der dann vil namhaftiger redlicher gethate gegen den Tartern vnd andern vo^elckern in ritterlichem krieg geu^ebt vnd nach absterben seins vaters die ko^enigclichen herrschung erobert. Der vierdt Alexander. den die Littawer von seiner vestmu^eetigkeit vnd bestendigkeit wegen inen zu eim hertzogen auffgenomen haben. Der fu^enft Sigismundus ein nachfolger vetterlicher fu^oßstapfen in tugenten. Der sechst Fridericus der iungst ward erstlich bischoff zu Crackaw. darnach ertzbischoff zu Gnysen erkorn vnd in dem .M.cccc.xciii. iar^[2] von babst Alexandro mit cardinelischer wirdigkeit begabt. Der fu^enff to^echter ist eyne hertzog Georgen zu bayern. Die ander marggraff Friderichen zu Brandemburg. Die dritt dem hertzogen zu Pomern vermehelt. Die andern zwu^o nochmals vnuermehlet enthalten sich bey der mu^oter.

CCLXIV recto:

Von Sant Stanislao bischoff zu Crackaw vnd patron des polnischen lands^[3]

Sant Stanislaus bischoff

DEr heillig Stanislaus ein man gross vermu^ogens bey got des gantzen polnischen lands ein patron vnd fannen trager wardt geporn in dem .M.viii iar vnßers hayls^[4] auff dem gew Stzeppanowo genant auß edeln vnd namhaftigen eltern. die sich flißen in den gotzhewßern go^etlichs diensts zewarten vnnd got mit gu^eetigen gebetten anzeru^eeffen. Als er nw zu zymmlichem alter komen was do zohe er auß seins vaters vermanung in die hohen schu^ol gein Parys sich daselbst auff lernung gu^oter kunst vnd sunderlich der go^etlichen recht mit ho^ehstem gleiß begebende. nicht in fu^ersatz (wie yetzo vnßer su^enlein thun) vil gelts. gross ere vnd hoh stennd zeerlangen. sunder nach gestalt yeder sachen. also dem armen als dem reichen gerechtigkeit mitzetailn vnd einem yeden das sein zegeben. Darnach zohe er widerumb anhayms vnnd kome gein Crackaw daselbst wardt er von seiner tugent vnd kunst wegen zu thumherrlicher erwirdigkeit gefu^erdert vnd nach absterben des bischofs daselbst auß go^etlicher fu^ersehung in den bischoflichen stu^ol gesetzt. der vnderstund sich mit großem fleiß den heilligen glawben vnd go^etlichen dienst zeerweittern. Er kawffet einßmals von eim ritter ein dorff. das erforderten nach absterben desselben ritters sein freu^end wider vom bischoff. aber nach dem er auß mangel vnd gepruch der vrkund vnd gezeu^egknus solchen kawff nit anzaigen kund do keret sich der heillig man mit gepetten vnd fasten zu got dem gewalt vnd mechtigkeit des ho^ehsten gottes getrawende vnd gieng zu dem grab des gestorben ritters vnd weltzet den stayn vnd sand dauon got mit inniger andacht anru^eeffende vnd fu^eeret denselben gestorben ritter widerumb in das leben vnd stellet ine fu^er den tyrannen Boleslaum vor dem die sach rechtlich gehandelt wardt. alda zaiget er in gegenwertigkeit seiner widersacher vnd der landherrn des ko^enigreichs mit demselben ritter an das er das dorff von ime erkawfft het. Nw lebet derselb Boleslaus in schno^edigkeit vnd vbet alle wu^eetterey vnd vntrewe gegen seinem volck. vnd peyniget die lo^eblichen treffenlichen mann vnd erbere burgere mit hertter marter. Aber diser cristenlich man Stanislaus maynet solchs nicht lenger zegedulden vnd gieng behertzt vnd vnerschrocken zu dem wu^eetrich ine vermanende von solchen dingen abzesteen. aber er vbet sein boßheit ye mer vnd mer. Darnach wardt er von dem bischoff in den pan gethan. dem nach schicket der wu^eedtend tyrann sein hofdiener auß mit befelhe disen Stanislaum wo sie den fu^enden zeerto^edten. Nw was zurselben zeit der heillig Stanislaus in Sant Michaels kirchlein in der stat Casimiro gepawt daselbst das ambt der mess haltende. Als nw des ko^enigs Boleslai diener an dasselb end komen vnd sich dreymal in die kirchen zegeen vnderstunden do warden sie auch dreymaln auß go^etlichem gewalt abgetriben vnd fieln zu rugk. Als solchs an den wu^eetrich Boleslaum gelangt do eylet er mit großem grymmen zu der benanten kirchen. darinn schlu^og er Stanislaum ob dem altar mess haltende zu todt. vnnd der leichnam wardt durch die diener Boleslai zu stu^ecken zerhawen. vnnd fu^er die statt den vo^egeln fu^ergeworffen. aber auß go^etlicher fu^ersichtigkeit durch die adler widerzusammen gesammelt vnd mit grossem fleiß bewaret so lang bis der mit großer ererbietung begraben ward. Darnach ward er in die zal der heilligen geschriben vnd in das ko^enigclich schloss in sant Wentzlaws kirchen gefu^eert daselbst in einem guldin sarch leu^echtet er an vil wunderzaichen.

Von krackaw der konigclichen statt des polnischen lands^[5]

KRackaw die namhaftig vnd durchleu^echtig statt des Polnischen lands an dem fluss Weichßel genannt gelegen ist von Kracco dem ersten polnischen hertzogen gepawt vnd also nach ime genambt worden. Dise statt ist erstlich mit hohen zynnen. mit ergkern. vorwern vnnd hohen thu^ernen. darnach mit einer klainen alten pawfelligen mawr. vnd zu letst mit schu^ett vnd greben vmbfangen. derselben greben sind ettliche mit visch wasser gefu^elt. ettliche mit gestewde verwachßen. Ein wasser Rudys genant vmbfleu^eßt die gantzen statt vnd treybt mu^elredere. der wirdt in rynnen vnd ro^eren vnder der erden durch die gantzen statt gelaytet. Dise statt hat siben pforten vnd vil scho^ener lu^estiger burgerßhewser. vnd vil großer gotzhewßer. Fu^ernemlich vnßer lieben frawen mitten in der statt wesende mit zwayen hohen thu^ernen. Auch vil clo^ester vnd darinn vil gaistlicher vnd andechtiger veter. In dem gotzhawß der heilligen trifaltigkeit ist der prediger orden. In demselben gotzhawß reichßnet der selig Jacinctus in vil wunderwercken. wiewol er nochmals in der heilligen zal nicht angesagt ist. Der hat dieweil er noch lebet drey todten erweckt. Daselbst ist auch ein kirch sant Franciscen ordens. aber nochmals nit reformirt vnd vil andere clo^ester. Auch ist ein kirch nicht verre von der pforten der Weichßel zu sant Anna genant. alda dann der selig Cantus ein treffenlicher doctor der hohen schu^ol diser stat an vil wundergeschihten leu^echtet. wiewol er auch nochmals in der heilligen zal nit geschriben ist. Bey disem heilligen tempel ligt die gross treffenlich hohschu^ol mit vil klaren hohberu^embten vnd wolgelerten mannen besetzt. alda dann vil vnd mancherlay freyer kunst. lere vnnd schriftliche weißheit plu^eet. Dise gotzhewßer hat der heillig Vladislaus der durchleu^echtigst Polnisch ko^enig. als er in dem grawsamen ernstlichen streyt wider die prewssen obsigung erlanget (von welchem streyt vil treffenlicher namhaftiger schriften bis in vnßer zeit in dem ko^enigclichen schloss dauon wir schier hernach sagen werden vorhanden sind) mit großer ko^estlichkeit erpawt. vnd mit hohen freyheiten vnd begabungen

---

1. 1400 n. Chr.
2. 1493 n. Chr.
3. Stanislaus von Krakau, auch Stanislaus von Szczepanów (* um 1030 in Szczepanów bei Krakau; † 11. April 1079 in Krakau) war Bischof von Krakau in Polen und gilt als einer der polnischen Nationalheiligen, siehe Wikipedia-Artikel.
4. 1008 n. Chr.
5. Krakau (Kraków) war ab 1000 Bischofssitz und 1038–1596 Hauptstadt Polens.