Die hinnen varn die ſagen dvr got

Die hinnen varn die ſagen dvr got·
dc ieruſalem der reinen ſtat vn̄ ǒch dem lande·
helfe noch nie noͤter wart·
dú klage wirt der tvmben ſpot·
die ſpꝛechent alle wer es vnſirm herrē ande·
er reche es an ir aller vart·
nv mvgent ſi denken dc er leit den grīmen tot·
der groſſen marter waſ im ǒch vil gar vnnot·
wan dc in erbarmet vnſer val·
ſwen nv ſin crúze vn̄ ſin grab niht wil erbarmen·
dc ſint vō im die ſelden armē·

Nv was gelǒben wil der han·
vn̄ w̾ ſol ime zehelfe komen an ſinē ende·
der got wol hvlfe vn̄ tůt es niht·
als ich mich v̾ſinnen kan·
es enſi vil gar ein ehafte not dú in des wende·
ich wene er es vberſiht·
nv lat dc grab vn̄ ǒch dc krv́ce gerúwet ligē·
die heidē wellēt einer rede an vns geſigē·
dc goteſ mv̊ter niht ſi ein maget·
ſwem diſú rede niht nahe an ſin h̾ze vellet·
owi war hat ſich der geſellet·

Mich habent die ſoꝛge vf dc bꝛaht·
dc ich vil gerne krankē mv̊t vō mir v̾tribe·
des wc min h̾ze her niht fri·
ich gedenke alſo vil mange naht·
wc ſol ich wider got nv tůn ob ich belibe·
dc er mir genedic ſi·
ich weis niht vil grôſſe ſchulde die ich habe·
niwan eine der kume ich niemer abe·
alle ſv́nde lieſſe ich wol wan die·
ich mīne ein wib voꝛ al der w̾lte in mîme gemvͤte·
got h̾re dc vervach ze guͤte·