Die hinnen varn die sagen dvr got
[180r]
Die hinnen varn die sagen dvr got·
dc ierusalem der reinen stat vnd ǒch dem lande·
helfe noch nie noͤter wart·
dú klage wirt der tvmben spot·
die sprechent alle wer es vnsirm herren ande·
er reche es an ir aller vart·
nv mvgent si denken dc er leit den grimmen tot·
der grossen marter was im ǒch vil gar vnnot·
wan dc in erbarmet vnser val·
swen nv sin crúze vnd sin grab niht wil erbarmen·
dc sint von im die selden armen·
Nv was gelǒben wil der han·
vnd wer sol ime zehelfe komen an sinem ende·
der got wol hvlfe vnd tůt es niht·
als ich mich versinnen kan·
es ensi vil gar ein ehafte not dú in des wende·
ich wene er es vbersiht·
nv lat dc grab vnd ǒch dc krv́ce gerúwet ligen·
die heiden wellent einer rede an vns gesigen·
dc gotes mv̊ter niht si ein maget·
swem disú rede niht nahe an sin herze vellet·
owi war hat sich der gesellet·
Mich habent die sorge vf dc braht·
dc ich vil gerne kranken mv̊t von mir vertribe·
des wc min herze her niht fri·
ich gedenke also vil mange naht·
wc sol ich wider got nv tůn ob ich belibe·
dc [180v] er mir genedic si·
ich weis niht vil grôsse schulde die ich habe·
niwan eine der kume ich niemer abe·
alle sv́nde liesse ich wol wan die·
ich minne ein wib vor al der werlte in mîme gemvͤte·
got herre dc vervach ze guͤte·