Do ich das gruͤne lǒb erſach

Do ich das gruͤne lǒb erſach·
do lies ich vil der ſwere min·
vō einē wibe mir geſchach·
dc ich mv̊s iemer mere ſin·
vil wūneklichē wol gemv̊t·
es ſol mich alles dvnken gůt·
ſwas ſi mir tůt·

Ich ſach vil wūneklichē ſtan·
die heide mit de blv̊mē rot·
der viol der iſt wol getan·
deſ hat dú nahtegal ir not·
wol vb̾wūden dú ſi twanc·
zergangē iſt d̾ wint̾ lanc·
ich hoꝛte ir ſanc·

Si ſchiet vō ſoꝛgē minen lib·
dc ich dekeine ſwere han·
wan ane ſi vier tvſēt wib·
dien hetenſ alle niht getan·
ir gvͤte wendet minú leit·
ich han ſi mir ze frúnde bereit·
ſwaſ ieman ſeit·

Mir enmac niht leides widerſtan·
des wil ich gar an angeſt ſin·
ergat eſ als ich willē han·
ich lege ſi an den arn min·
dc mir der ſchonē wurde ein teil·
dc duhte mich ein michel heil
vn̄ were ǒch geil·

Das ich ir ſo holdes h̾ze trage·
dc iſt in ſvmelichē leit·
dar vmbe ich niemer ſo v̾zage·
ſi v̾lieſent alle ir arbeit·
waſ hilfet ſi ir arger liſt·
ſine wiſſen wie eſ ergangen iſt·
in kurzer friſt·