Do ich das gruͤne lǒb ersach

Do ich das gruͤne lǒb ersach·
do lies ich vil der swere min·
von einem wibe mir geschach·
dc ich mv̊s iemer mere sin·
vil wunneklichen wol gemv̊t·
es sol mich alles dvnken gůt·
swas si mir tůt·

Ich sach vil wunneklichen stan·
die heide mit de blv̊men rot·
der viol der ist wol getan·
des hat dú nahtegal ir not·
wol vberwunden dú si twanc·
zergangen ist der winter lanc·
ich horte ir sanc·

Si schiet von sorgen minen lib·
dc ich dekeine swere han·
wan ane si vier tvsent wib·
dien hetens alle niht getan·
ir gvͤte wendet minú leit·
ich han si mir ze frúnde bereit·
swas ieman seit·

Mir enmac niht leides widerstan·
des wil ich gar an angest sin·
ergat es als ich willen han·
ich lege si an den arn min·
dc mir der schonen wurde ein teil·
dc duhte mich ein michel heil
vnd were ǒch geil·

Das ich ir so holdes herze trage·
dc ist in svmelichen leit·
dar vmbe ich niemer so verzage·
si verliesent alle ir arbeit·
was hilfet si ir arger list·
sine wissen wie es ergangen ist·
in kurzer frist·