Doctor Brants Narrenschiff/Das Gute behindern

« Wahrheit verschweigen	Sebastian Brant Doctor Brants Narrenschiff	Vom Aufgeben guter Werke »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Wer will der worheyt by gestan
Der mu^oß gar vil durechter han
Die jnn abkeren vnderstan

Hyndernys des gu^oten.

Der ist eyn narr durch all syn blu^ot
Wer hyndern will eyns andern gu^ot
Vnd er zu^o wo^eren vnderstat
Do von er doch entpfocht keyn schad

5

Vnd sicht gern / das eyn ander sy

Im glich / vnd sta^eck jm narren bry
Dann narren all zyt hassen du^ont
Die / so mit gu^otem ding vmb gont
Eyn dor / den andern nit gern sicht

10

Dem rechten doren doch geschicht

Das er jnn freüden sich nit spar
Das er alleyn nit sy eyn narr
Dar vmb er allzyt flisset sich
Wie yederman syg synen glich

15

Vnd ratt das er nit sy alleyn

Der narr / der trag den kolben heyn
Wann man sicht eynen der do will
Recht du^on / vnd syn jnn wißheyt still
So spricht man / schow den duckelmuser

20

Er will alleyn syn eyn Carthuser

Vnd tribt eyn apostützer stodt
Er will verzwifflen gantz an gott
Wir went eben als wol erwerben
Das gott vnß loßt jnn gnaden sterben

25

Als er / wann er schon tag / vnd nacht

Lyt vff den knüwen / ba^et / vnd wacht /
Er will vasten / vnd za^ellen buwen
Er gtar gott noch der welt truwen
Gott hat vnß nit dar vmb geschaffen

30

Das wir münch werden oder pfaffen

Vnd vor vß das wir vnß entschlagen
Der welt / wir went keyn kutten tragen
Noch kapp / sie hab dann schellen ouch
Schow vmb den narren / vnd den gouch

35

Er mo^echt noch jnn der welt han gethan

Vil gu^ottes / Vnd hett nach gro^essern lon
Entpfangen / hett er vil gelert
Vnd vff den weg der sellikeyt kert
Dann das er do lyt wye eyn schwyn

40

Vnd mo^esßt sich jn der zellen syn

Oder bricht jm sunst so vil ab
Das er keyn freüd noch kurtz wil hab /
Solt / wie er du^ot / du^on yederman
In der Carthuß die kutten an

45

Wer wolt die welt dann fürbas meren

Wer wolt die lüt / wysen vnd leren /
Es ist gotts will / noch meynung nit
Das man der welt sich ab schüt
Vnd vff sich selb alleyn hab acht /

50

Sollch red du^ont narren tag vnd nacht /

Die jnn der welt hant als jr teyl
Des su^ochen sie nit selen heyl /
Ho^er zu^o / wa^erstu joch wiß vnd klu^og
Es weren dennaht narren gnu^og

55

Wann du schon hettest münchesch geba^erd

Es weren narren me vff erd /
Wer yederman gsyn din glich
Es wer keyn mensch jm hymelrich /
Wann du joch wa^erst eyn witzig gsel

60

Es fu^eren dannacht vil zu^or hell

Wann ich zwo selen hett jnn mir
Setzt ich licht eyn den gesellen für
Aber so ich hab eyn alleyn
So mu^oß ich sorg han vmb die eyn

65

Gott hat mit Belyal nüt gemeyn